Þingflokkur Sjálfstæðisflokksins og aðstoðarmenn eru að ferðast hringinn í kringum landið þessa dagana til að hitta kjósendur og fá að vita hvað brennur á þeim.
Brynjar Níelsson, aðstoðarmaður Jóns Gunnarsson, er greinilega með í för en hann skrifar um ferðina á Facebook.
„Þegar það er appelsínugul viðvörun er ekki sniðugt að fara í hringferð um landið. Í þingflokki sjálfstæðismanna eru nokkrir í fjaðurvigt. Diljá Mist mun vera 25 kíló í öllum fötum og var því ekki hægt að hleypa henni úr rútunni nema í beisli. Hún var heppin að með í för var yfirmaður almannavarna og einstaklega lipur aðstoðarmaður hans,“ skrifar Brynjar.
„Umhverfisráðherra ætti að vera nokkuð hólpin í fárviðrinu enda bætt töluvert á sig. Hann er hins vegar afskaplega veðurhræddur sem var ekki ábætandi ofan á loftslagskvíðann. Hann liggur því í hnipri aftast í rútunni og neitar að hitta nokkurn mann. Aðrir taka vindinn í fangið og sofa síðan á fundum,“ bætir hann við.
„Diljá og Gulli hafa lagt til að næsta hringferð verði á Tene. Þar sé betra veður og auk þess meiri líkur á að rekast á kjósendur,“ skrifar Brynjar að lokum.
