Segir smitin fyrst og fremst tengjast ungu fólki og vill enduropnun

Kjartan Már Kjartans­son, bæjar­stjóri Reykja­nes­bæjar, skorar á stjórn­völd að endur­skoða á­kvörðun um tak­markanir á landa­mærunum. Hann segir að sínar upplýsingar bendi til þess að smitin í annarri bylgju faraldursins tengist fyrst og fremst ungu fólki sem fór ónærgætilega um Verslunarmannahelgina. Þetta kemur fram í Face­book færslu þar sem Kjartan segir að á­kvarðanirnar muni hafa ó­fyrir­sjáan­legar af­leiðingar í för með sér fyrir Suður­nesin.

„Nú eru á­hrif nýrra reglna, sem skylda alla far­þega sem koma til landsins í 2 skimanir og 5 daga sótt­kví, farnar að koma í ljós. Far­þegum um Kefla­víkur­flug­völl fækkar aftur ört, enda landið í raun lokað, og flug­fé­lög fella niður ekki bara ein­staka ferðir heldur á­ætlanir haustsins og jafn­vel vetrarins,“ skrifar Kjartan.

Hann rifjar upp að þúsundir Suður­nesja­manna hafi misst vinnuna síðast­liðið vor vegna út­breiðslu CO­VID-19 en hluti þeirra hafði fengið endur­ráðningu. Farið hafi verið að birta til en nú sé aftur svart fram­undan.

„Nú berast fregnir af fyrir­huguðum fjölda­upp­sögnum á flug­vellinum á ný með gríðar­lega al­var­legum af­leiðingum fyrir fjöl­skyldur og efna­hags­líf á Suður­nesjum en Kefla­víkur­flug­völlur er upp­spretta um 40% efna­hags­lífs á svæðinu. Það munar um minna.“

Hann segir menn greina á hvort hér sé um nauð­syn að ræða. Sam­kvæmt upp­lýsingum Kjartans hafi smitin sem upp hafi komið í seinn far­aldrinum fyrst og fremst ungu fólki sem ekki hafði farið nægi­lega gæti­lega um Verslunar­manna­helgina.

„Og yfir­völd voru búin að ná nokkuð góðum tökum á á­standinu. Ég tel að stjórn­völd séu að taka á­kvarðnir sem munu hafa ó­fyrir­sjáan­legar en gríðar­lega al­var­legar af­leiðingar fyrir Suður­nesin án nægrar í­grundunar. Ég skora á þau að endur­skoða þessa á­kvörðun og byrja til dæmis á minna í­þyngjandi að­gerðum eins og t.d. að skima alla.“