Segir skýrslu Ríkisendurskoðunar áfellisdóm: „Eftir stendur að Sjálf­stæðis­flokkurinn kann ekki að selja banka“

Sigmundur Ernir Rúnarsson, ritstjóri Fréttablaðsins, segir nýútkomna skýrslu Ríkis­endur­skoðunar um sölu á hlut ríkisins í Ís­lands­banka á­fellis­dóm um sleifar­lag, van­kunn­áttu og spillingu í boði hins opin­bera sem þarfnist frekari rann­sóknar við. Ljóst sé að Sjálfstæðisflokkurinn kunni ekki að selja banka.

„Skýrslan er at­hyglis­verð fyrir tvennar sakir, annars vegar hvað hún gengur hart og ó­hikað fram í gagn­rýni sinni á söluna og allan að­draganda hennar, þar á meðal leka innan bankans sjálfs, og hins vegar sýnir skýrslan að það var bein­línis rangt af fjár­mála­ráðu­neytinu að fela Ríkis­endur­skoðun að rýna í þessa um­deildu sölu, enda hefur hún ekki nógu ríkt um­boð til að grand­skoða gaura­ganginn. Í reynd má lesa það víða út úr 72 síðum skýrslunnar og þá ekki síður á milli línanna að for­kólfar Ríkis­endur­skoðunar eru bein­línis hissa á að þeir hafi fengið verk­efnið í hendur," skrifar Sigmundur Ernir í leiðara Fréttablaðsins í dag.

"Skýrsla Ríkis­endur­skoðunar stað­festir að meira og minna allt brást í þessu efni, þar á meðal ráð­herrann og ráðu­neyti hans, að minnsta kosti tvær nefndir þingsins, að ekki sé minnst á Banka­sýslu ríkisins sem hafði ekki einu sinni þekkingu til að fara þá leið við söluna sem hún valdi, hvað þá meira. „Fjár­mála- og efna­hags­ráðu­neyti mátti vera ljóst að hjá Banka­sýslu ríkisins störfuðu einungis þrír starfs­menn með enga reynslu af sölu ríkis­eigna með til­boðs­fyrir­komu­lagi og tak­markað svig­rúm til al­mennrar upp­lýsinga­gjafar,“ segir orð­rétt í skýrslunni. Heyr á endemi, “ skrifar Sigmundur. Allt þetta hafi verið gert með blessun ríkjandi stjórn­valda sem viður­kenni, ýmist með semingi eða sæmi­lega for­taks­laust, að salan hafi verið klúðurs­leg. „En þó ekkert um­fram það,“ skrifar Sigmundur.

„Á­byrgðin á þessum galna gerningi er svo auð­vitað engin eins og við má búast af ís­lenskri pólitík. Stjórnar­and­staðan hefur vita­skuld kallað eftir því að fjár­mála­ráð­herra, hið minnsta, stígi til hliðar á meðan á ó­háðri fram­halds­rann­sókn stendur, en læsir menn á lands­málin vita sem er að ekkert verður af því í stjórn­mála­menningu sem leyfir æðstu vald­höfunum alltaf að njóta vafans, hvað svo sem á gengur,“ skrifar Sigmundur, og heldur áfram:

„Eftir stendur að Sjálf­stæðis­flokkurinn kann ekki að selja banka. Og það er ekki nokkur von til þess að lands­menn treysti honum fyrir sölu á frekari hlut í Ís­lands­banka, eða öðrum bönkum, sem ofan í kaupið setur fjár­mála­á­ætlun næstu ára í upp­nám.“