Pétur G. Markan, upplýsingafulltrúi Biskupsstofu og fyrrverandi sveitarstjóri, hefur sagt sig úr Samfylkingunni. Ástæðuna segir hann vera að flokkurinn sé hættur að vera „breiðfylking“ og sé nú orðinn „pólitískt jaðarsamfélag vina“.
Hann segir í bréfi sem hann sendi til Samfylkingarinnar að hann hafi lengi hugsað um málið og að alltaf hafi hann ákveðið að bíða og sjá, en það geti hann ekki gert lengur.
„Ég hef verið þátttakandi í Samfylkingunni frá upphafi fundarins í Borgarleikhúsinu hvar Samfylking - breiðfylking jafnaðarmanna var stofnuð. Fór með mömmu og varð heillaður. Fann mér stað meðal ólíkra einstaklinga með sömu hugsjón - jöfnuð á breidd samfélagsins.
Hef á þeim tíma gegnt mörgum trúnaðarstörfum fyrir flokkinn: formaður ungra jafnaðarmanna í RVK og hef setið sem varaþingmaður Samfylkingarinnar á Alþingi svo eitthvað sé týnt til sem stendur meira upp úr en annað,“ segir hann.
Hann segir að eftir að þessar breytingar hafa orðið á flokknum finni hann ekki lengur að hann eigi erindi innan flokksins eða að hann vilji fylgja honum.
„Það hefur fyrst og fremst birst í því að ég hef ekki viljað gefa kost á mér til trúnaðarstarfa eða verið í framboðs hugleiðingum. Lesið sameiginlegt spjall flokksins á netinu og velt fyrir mér hvort það sé ekki ljós að finna annars staðar. Það eru því ekki pólitísk frama-vonbrigði eða listablús sem eru til grundvallar þessari ákvörðun.
Ég verð eftir sem áður jafnaðarmaður í huga og hjarta - þar sem breiðfylking ólíkra sjónarmiða skipar stefnu landsins. Annað verður ekki nema pólitískt heimapartý. Leyst upp þegar næsti stjórnarsáttmáli verður undirritaður,“ segir Pétur og þakkar síðan fyrir samstarfið.
Bréfið má lesa í heild hér að neðan.
Eftirfarandi bréf sendi ég á Samfylkinguna í morgun. Ég birti það hér til upplýsingar. Ég ætla ekki að hafa frekari orð...
Posted by Pétur G. Markan on Thursday, 15 April 2021
