Sigurgeir Pétursson, skipstjóri og ræðismaður, fer í pistli sem hann skrifaði á Vísi um helgina yfir þær fórnir sem Nýsjálendingar hafa þurft fram að færa í faraldrinum en þar hafa litlar sem engar takmarkanir verið innanlands en miklar og harðar takmarkanir á landamærunum.
Tilefni skrifa Sigurgeirs er pistill formanns Sósíalistaflokksins, Gunnars Smára Egilssonar, þar sem hann lofar það sem hann kallar „nýsjálensku leiðina“.
„Ég bý í útópíunni Nýja Sjálandi og hef gert í yfir 30 ár og þekki því ágætlega til. Það er alveg rétt hjá Gunnari Smára að hér hefur veiran lítið angrað okkur og lífið því nokkurn veginn gengið sinn vanagang innanlands síðan í maí 2020, án nánast nokkurra takmarkanna innan landamæranna.
En hinsvegar hafa verið í gildi mjög svo strangar reglur á landamærunum sem Gunnar Smári tiltekur ekki í grein sinni. Mér finnst því rétt, ef ætlunin er að skoða „nýsjálensku leiðina“ af alvöru, að tína til sumar fórnirnar sem við Nýsjálendingar höfum þurft að færa og gerum enn,“ segir Sigurgeir í pistli sínum.
Hann fer vel yfir þær takmarkanir sem eru í gildi fyrir Nýsjálendinga og íbúa landsins en Nýsjálendingar sem vilja koma til Nýja Sjálands þurfa allir að fara á sóttvarnarhótel í 14 daga og borga fyrir það sem samsvarar 280.000 krónum.
„Þá skiptir engu máli hvort fólk sé bólusett eður ei. Allir þurfa að gera það sama,“ segir Sigurgeir og gagnrýnir gallar kerfi sóttvarnahótela þar í landi en herbergin seljast iðulega upp og enginn veit hvenær eru aftur sett á sölu.
„Ef ég vildi t.d. bóka í dag, eru engin herbergi á lausu og allt fullbókað fram í lok nóvember. Næsta lota af herbergjum sem sett verður í sölu, en enginn veit hvenær, verður fyrir desember og janúar,“ segir Sigurgeir.
Getur ekki sinnt vinnu sinni
Hann segir að hann hafi undanfarna mánuði ekki getað sinnt vinnu sinni vegna þessa takmarkanna.
„Ég er sjómaður sem hef stundað mína vinnu erlendis í yfir 20 ár og flogið heim til Nýja Sjálands í mínum fríum. Það er nú orðið ógerningur og mín síðasta fjarvera sem venjulega er 2 mánuðir, varð að 7 mánuðum þar sem ég hreinlega fékk ekki sóttkvíarhótel herbergi á Nýja Sjálandi við heimkomu til míns heimalands,“ segir hann.
Komst ekki í jarðarför tengdamóður sinnar
Þá segir hann frá því að tengdamóðir hans, sem átti heima í Wales, hafi látist í maí og hvort hann né kona hans hafi komist í jarðarförina eða getað heimsótt tengdafaðir hans.
„Við eigum einnig þrjú dásamleg barnabörn a Íslandi sem við höfum ekki getað heimsótt síðan faraldurinn skall á, þar af eina dásamlega litla afadóttur sem við hofum ekki séð í persónu síðan hún fæddist i janúar 2020,“ segir Sigurgeir.
Hann segir að ríkisstjórn landsins hafi algerlega sofið á verðinum og nefnir sem dæmi að aðeins tíu prósent þjóðarinnar er bólusett.
Stór hluti landsmanna eru innflytjendur og hafa því ekki getað hitt fjölskyldur sínar.
Sigurgeir segir að ef það eigi að skoða að innleiða þessa leið hér á landi þá þurfi að taka þetta allt með í ákvarðanatökuna.
Pistilinn er hægt að lesa hér í heild sinni á vef Vísis.
