Sak­sóknarar fara með mál Gylfa gegnum fimm þrepa þröskulds­próf

Sam­kvæmt breska íþróttamiðlinum The At­hletic munu sak­sóknarar á vegum Sak­sóknara­em­bættis bresku krúnunnar nú keyra mál Gylfa Þórs Sigurðs­sonar í gegnum svo­kallað þröskulds­próf (e. threshold test). Mál Gylfa þarf að standast slíkt próf til þess að hægt sé að á­kæra í því.

Lög­reglan í Grea­ter Manchester hefur lokið rann­sókn sinni á máli ís­lenska knatt­spyrnu­mannsins Gylfa Þórs Sigurðs­sonar, sem var þann 16. júlí 2021 hand­tekinn, grunaður um kyn­ferðis­brot gegn ó­lög­ráða ein­stak­lingi en síðan látinn laus gegn tryggingu stuttu eftir hand­töku. Fréttablaðið greindi frá þessu á dögunum.

„Sak­sóknara­em­bætti bresku krúnunnar þarf nú að meta hvort raun­hæfar líkur séu á því að sak­fella leik­manninn  og hvort það sé í þágu al­manna­hags­muna að reka málið sem saka­mál fyrir dóm­stólum. Sak­sóknarar munu nú keyra málið í gegnum þröskulds­prófið, það verður málið að standast áður en haldið er á­fram með mál,“ segir í frétt The At­hletic.

„Al­var­leiki eða að­stæður máls verða að rétt­læta það að tekin sé á­kvörðun um að á­kæra í því og veru­leg rök þurfa að vera til staðar til þess að úti­loka lausn gegn tryggingu,“ segir á vef sak­sóknara­em­bættisins um þröskulds­prófið en síðan eru þröskuldarnir sem mál þurfa að standast til að hægt sé að á­kæra í þeim. Standist mál ekki einhvern af þröskuldunum fimm er málið látið niður falla:

• Rök­studdur grunur sé um að sá sem verði á­kærður hafi framið brot. Sak­sóknarar verða að ganga úr skugga um, við hlut­lægt mat á sönnunar­gögnum, að rök­studdur grunur sé um að sá sem á­kærður verður hafi framið brot.
  • Í þessu til­liti verður að taka til greina hver kyns vörn sá á­kærði gæti haft uppi fyrir dóm­stólum eða hvaða upp­lýsingar hann gæti reitt sig á.
  • Til að á­kvarða hvort rök­studdur grunur sé á broti verða sak­sóknarar að taka til­lit til allara gagna sem til eru um málið og hvort hægt sé að leggja þau fram til kynningar í dóm­sal; gögnin verði að vera á­reiðan­leg og trú­verðug.
• Til staðar séu sönnunar­gögn sem veiti raun­hæfar líkur á sak­fellingu
  • Sak­sóknarar verða að vera full­vissir um að sönnunar­gögnin sem séu til staðar veiti raun­hæfar líkur á sak­fellingu í málinu.
• Al­var­leiki eða að­stæður máls rétt­læti að tekin sé á­kvörðun um að á­kæra
  • Meta ber al­var­leika málsins og at­vik þess í tengslum við meint brot og skal það tengjast á­hættu þess að opnað sé fyrir lausn gegn tryggingu í málinu.
• Að til staðar séu veru­legar á­stæður til þess að leggjast leggjast gegn lausn gegn tryggingu í sam­ræmi við lög um tryggingar frá árinu 1976 og að við hvaða að­stæður sem koma upp í málinu sé rétt að gera það
  • Um­rædd á­kvörðun verði að byggjast á á­hættu­mati sem sýni fram á að sak­borningurinn sé ekki hæfur til að hljóta lausn gegn tryggingu, jafn­vel með veru­legum skil­yrðum.
• Það sé í þágu al­manna­hags­muna að á­kæra sak­borninginn