Saga Matthildur Árnadóttir fangaði hug og hjörtu íslensku þjóðarinnar í kvöld, en rétt í þessu var hún krýnd sigurvegari í úrslitakeppni Idol stjörnuleitar Stöðvar 2.
Saga Matthildur er 24 ára ættuð frá Bolungarvík en býr í Garðabænum. Hún stundar nám við Háskóla Íslands í tómstunda- og félagsfræði og samhliða því starfar hún í félagsmiðstöð.
Saga Matthildur mætti með gítarinn sinn í fyrstu áheyrnarprufuna, en þar flutti hún sína eigin útfærslu á lagi hljómsveitarinnar Blink 182, I miss you. Herra Hnetusmjör sagðist fullur aðdáunar eftir flutning Sögu Matthildar, hann sæi fyrir sér að hún gæti selt upp í sæti í Gamla Bíó á hálftíma.
Þrátt fyrir ungan aldur hefur Saga Matthildur áður stigið á svið og keppt í söng, en árið 2015 keppti hún í Söngvakeppni framhaldsskólanna fyrir hönd Fjölbrautaskólans í Garðabæ. Saga Matthildur hafnaði þar í þriðja sæti og vann símakosninguna.
Í samtali við Fréttablaðið fyrir úrslitakvöldið sagði Saga Matthildur að hún hafi ekki búist við að komast alla leið í úrslitin.
„Ég get nú ekki sagt það og svona í byrjun hélt ég að maður kæmist kannski áfram svona einu sinni, tvisvar og ætlaði bara að sjá til hvað myndi gerast. Og svo bara fór ég ekkert heim,“ sagði Saga Matthildur.
Hægt er að lesa meira hér.
