Fosshótel Reykjavík vilja aðeins greiða helming húsaleigunnar fyrir sex mánuði frá 1. apríl til 30. september í fyrra, þrátt fyrir að hafa framleigt hótelið til ríkisins fyrir 85 milljónum króna hærri upphæð en sem nemur leigunni.
Frá þessu greinir Fréttablaðið í morgun, en Pétur Guðmundsson, hjá Íþöku fasteignafélagi, sem á Þórunnartún 1 þar sem Fosshótel Reykjavík er til húsa, er allt annað en sáttur.
„Þetta eru bara undanbrögð og undanskot,“ segir hann.
Í héraðsdómi var dæmt að hótelfélagið ætti að greiða Íþöku 66,7 prósent af umsaminni leigu fyrir tímabilið 1. apríl 2020 til 31. mars 2021. Það mál bíður nú úrlausnar Landsréttar.
„Þeir eru að fá yfir átta hundruð milljónir frá ríkinu fyrir leigu á hótelinu og veitingar en borga okkur bara eitthvað ríflega tvö hundruð milljónir,“ segir Pétur
Þá segir Pétur: „Þeir voru að borga öllum nema okkur og það má ekki ef þú ert í greiðsluskjóli,“. Þar vísar hann til þess að um sama leyti og Fosshótel hafi verið leigt til ríkisins sem sóttvarnahótel hafi hótelkeðjan komist í greiðsluskjól frá kröfuhöfum.
Hægt er að lesa nánar um málið á vef Fréttablaðsins
