Sigurður Aðalsteinsson, faðir íslenska knattspyrnumannsins Gylfa Þórs Sigurðssonar sem var handtekinn í júlí á síðasta ári, grunaður um kynferðisbrot gegn ólögráða einstaklingi segir að það geti ekki gengið í réttarríki að menn séu látnir dúsa í eitt og hálft ár erlendis án dóms og laga en Gylfi hefur verið í farbanni á Bretlandi í rúma fimmtán mánuði. Þetta segir hann í viðtali við Fréttablaðið.
„Fjárhagslega getur hann (Gylfi Þór) klofið þetta en það eru ekki allir í sömu stöðu. Meðalmaðurinn getur ekki verið kyrrsettur í öðru landi, verið þar og bara beðið og beðið endalaust eftir því sem lögreglunni þóknast að ákveða hvort menn hafi gert eitthvað misjafnt.
Eina sem ég er að segja er að ef einhver maður er kyrrsettur í einhverju landi fyrir eitthvað áætlað brot, þá geturðu ekki látið hann dúsa þar í eitt ár, eitt og hálft ár og beðið bara endalaust. Á hann bara að vera á hóteli á meðan eða íbúð? Hvað á hann að gera?“
Sigurður greindi frá því í viðtali á vef Vísis fyrir tíu dögum síðan að sótt hefði verið um flutning á lögheimili Gylfa til Íslands. Hins vegar geti flutningurinn ekki gengið í gegn sökum þess að Gylfi er í farbanni og svo flutningur á lögheimili geti gengið í gegn þarf umsóknaraðilinn að mæta í eigin persónu og framvísa skilríkjum hér heima en með því væri Gylfi að gerast brotlegur við lög.
Fjölskylda hans leitaði til utanríkisráðuneytisins í von um aðstoð en í skriflegu svari við fyrirspurn Fréttablaðsins á dögunum sagði ráðuneytið að sé grunur um refsiverða háttsemi Íslendings erlendis sé ráðuneytinu ekki heimilt að hafa afskipti af meðferð slíkra sakamála.
Sigurður segir að það sem komi frá utanríkisráðuneytinu nú um málið nú séu bara útúrsnúningar.
„Ég bað um hjálp,“ segir Sigurður í samtali við Fréttablaðið. „Hringdi í ráðuneytið og bað um hjálp en fæ hana ekki. Ég er ekkert að grenja neitt meira yfir því, ráðuneytið veit alveg af þessu en þeir eru bara ekkert að gera.“
Málið horfi þannig við honum að ráðuneytið virðist ekki hafa neinn áhuga á að aðstoða fjölskylduna.
„Þeir hafa akkúrat ekkert gert. Utanríkisráðuneytið hefur akkúrat ekkert gert. Þegar að Guðlaugur Þór Þórðarson var utanríkisráðherra þá var manni svarað, þau vildu hjálpa.“
Aðstæður séu nú breyttar frá því að Sigurður hafi á sínum tíma sett sig í samband við Guðlaug Þór.
„Samskipti mín við Guðlaug Þór eiga sér stað um mánuði eftir að þetta kemur upp og ég spyr hvernig sé best að við snúum okkur í þessu. Þá fórum við bara yfir stöðuna og á þeim tíma var það ekki talið gáfulegt af hálfu íslenskra stjórnvalda að fara skipta sér af málinu.
En það gæti kannski verið gáfulegt að fara gera það núna vegna þess að núna er verið að brjóta á réttindum íslensks ríkisborgara að mínu viti. Ég er ekkert einn um þá skoðun.“
Það sé fullt af prófessorum og lærðum mönnum sem segi að í þessu máli sé verið að brjóta á mannréttindum Gylfa Þórs.
„Annað hvort verða þeir að ákæra manninn eða láta hann lausan. Þeir hafa gert hvorugt.“
Hægt er að lesa alla fréttina hér.
