Óður maður skaut á feðga á leið í leik­skólann: Sýknaður en þarf að sæta öryggis­gæslu

Vísað var til áttunda kapítula Mann­helgis­bálks Jóns­bókar í dómi Héraðs­dóms Reykja­víkur á dögunum, en þar kemur fram að „ef óðr maðr brýst ór böndum ok verðr hann manns bani, þá skal bæta af fé hans ... ef til er ... En ef óðr maðr særir mann, þá skal arfi uppi láta vera sár­bætr ok læknis­fé af fé hins óða.“

Í dómnum var karl­­maður á sjö­tugs­aldri sýknaður af á­kæru um til­raun til mann­dráps þegar hann skaut á feðga í kyrr­stæðum bíl fyrir utan leik­skóla við Mið­vang í Hafnar­firði í júní á þessu ári. Sonurinn var rúm­lega sex ára þegar á­rásin átti sér stað. Frétta­blaðið greinir frá.

Þó á­kvarðaði héraðs­dómur að maðurinn skyldi vera vistaður á við­eig­andi stofnun, en sannað þótti að hann hafi framið verknaðinn. Þá þarf hann að sæta upp­töku á 22 kalí­bera riffli, sem hann notaði í á­rásinni.

Manninum er einnig gert að greiða brota­þolunum tveimur sam­tals 1.7 milljónir króna. Við þá á­kvörðun vísaði dómari til áttunda kapítula Mann­helgis­bálks Jóns­bókar, sem er frá þrettándu öld, um að brota­þolar eigi rétt á miska­bótum.

At­vikið átti sér stað þann 22. júní á þessu ári. Maðurinn var á­kærður fyrir til­raun til mann­dráps fyrir að hafa á svölum í­búðar sinnar á þriðju hæð miðað á bílinn sem feðgarnir voru í og hleypt af tveimur skotum.

Fyrra skotið fór í gegnum aftur­hlera bif­reiðarinnar og stöðvaðist í baki far­þega­sætisins þar sem drengurinn stóð, en seinna skotið fór ofar­lega í vinstri aftur­hurð bif­reiðarinnar þannig að bíl­rúðan brotnaði og rigndi gler­brotum yfir manninn sem sat í skot­stefnu kúlunnar í öku­manns­sæti bif­reiðarinnar.

Í dómnum kemur fram að maðurinn hafi verið í mjög slæmi á­standi þegar verknaðurinn var framinn og hafi fram­burður hans því verið mjög ruglings­legur.

Í lög­reglu­skýrslu sagði maðurinn til dæmis að fólk sem hefði ekki viljað honum gott hefði komið að íbúð hans um nótt til að lýsa á hana „eins og hjá Helga Seljan“. Hann hefði talið að maðurinn í bílnum væri glæpa­maður og hann hefði þurft að stöðva hann áður en lög­reglan kæmi á vett­vang.

Í fram­burði sínum fyrir dómi sagðist maðurinn ekki hafa séð barn í bílnum og sagðist ekki hafa gert sér grein fyrir hvaða af­leiðingar hátt­semi hans gæti haft né hugsað út í það.