Hildur Björnsdóttir, oddviti Sjálfstæðisflokksins í Reykjavík og jafnframt stærsta flokksins í borginni, segir að staða flokks hennar sé góð og að hún muni hefja umræður við aðra oddvita á næstu dögum um myndun nýs meirihluta í borginni.
„Við metum stöðuna góða,“ segir Hildur Björnsdóttir, oddviti Sjálfstæðisflokksins, og að næstu dagar fari í það að ræða við aðra oddvita. Nánar er rætt við Hildi á vef Fréttablaðsins.
Hún segir að niðurstöður kosninganna í Reykjavík séu skýrt ákall um breytingar.
Einar Þorsteinsson oddviti Framsóknarflokksins tekur undir það og segir að hann ætli að meta daginn í að fara yfir stöðu mála og að hann muni ræða við aðra oddvita með óformlegum hætti í dag.
„Við spurðum fyrir þessar kosningar hvort það væri ekki kominn tími á breytingar og kjósendur hafa svarað því með afdráttarlausum hætti,“ segir Einar í viðtali við Fréttablaðið.
Dagur B. Eggertsson oddviti Samfylkingarinnar segir það liggja skýrt fyrir að það verði ekki sami meirihluti í Reykjavík. Hann segir að það gildi enga reglur um meirihlutaviðræður eins og eftir Alþingiskosningar og gerir ráð fyrir því að nýr meirihluti verði myndaður í kringum þau málefni sem þarf að setja á oddinn.
