Örn Árnason, leikari, kvartar yfir því í hverfahóp fyrir íbúa Breiðholts að á sama tíma og vorið sé í lofti þá séu spreybrúsar komnir á loft sem veki ekki sömu gleði. Hann spyr hvort ekki sé mál að linni og bendir á að kostnaðurinn við að þrífa spreyið geti hlaupið á tugum eða hundruðum þúsunda.
Örn segist skilja að í „gamla daga“ hafi þetta verið ákveðið „statement“, að merkja sér einhver flöt en segir að í dag séu til svo margir miðlar þar sem fólk getur tjáð sig að þessi leið sé mögulega orðin óþörf.
„Í dag eru til ótal miðlar, instagram, snapp, tiktok að ég tali nú ekki um feisbúkk þar sem hægt væri að koma sér á framfæri ef þú hefur einhverju að miðla!. En spreyið í dag er bara skemmdarverk og kostar húseigendur þúsundir og stundum hundruðir þúsunda að lagfæra. Getum við ekki tekið höndum saman um að láta svona eiga sig?. Við mótum umhverfið og þegar svona árásir eru ár eftir ár, þá gefast menn stundum upp og láta í minni pokann og þá er ekki skrýtið að menn grípi í "gettó" líkinguna. Eina ráðið virðist því vera að mála þessa skrattakolla út í horn og mála yfir þetta aftur og aftur. Er ekki mál að linni?,“ segir Örn í færslunni.
Fjölmargir skrifa athugasemdir við færsluna og leggja til að í stað hvítra veggja sé listamönnum boðið að búa til list sína á þá. Með því væri mögulega hægt að koma í veg fyrir „tögg“ og önnur merki.
