Heilbrigðiseftirlitið setti upp hljóðmæli á horni Bankastrætis og Laugavegs síðastliðinn vegna fjölda hávaðakvartana sem hafa borist frá íbúum á svæðinu. Lætin frá næturlífinu hafa lengi verið til umræðu, en Íbúasamtök Miðborgar héldu í síðustu viku málþing vegna deilna á milli íbúa og skemmtistaða.
„Síðustu helgi var Iceland Airwaves í gangi og þá var ákveðið meðal annars að setja upp mæli á þessu svæði. Út af fjölda kvartana var ákveðið að setja upp mæli á þessu horni, en þetta er liður í því að bregðast við kvörtunum og sinna rannsóknarskyldu okkar,“ segir Helgi Guðjónsson, verkefnastjóri hjá Heilbrigðiseftirliti Reykjavík.
Helgi segir að með mælinum sé verið að fylgjast með hvað hljóðstigið sé hátt á svæðinu, en einnig var settur upp mælir inn á skemmtistaðinn Sólon.
„Þetta er gott tól fyrir okkur í vinnslu kvartana og til að fylgjast með því hvort það sé verið að fara eftir settum lögum og reglum. Um hávaða frá fyrirtækjum gildir reglugerð um hávaða, og samkvæmt henni á samkomum má ekki vera hærra en 95 desíbel,“ segir Helgi.
Helgi segir að ef staður gerist sekur um brot geti heilbrigðiseftirlitið gripið til þvingunaraðgerða.
„Þegar við getum staðfest það að staður sé að spila of háa tónlist, þá förum við fram á úrbætur. Ef engar úrbætur eru gerðar getum við takmarkað starfsemina og meðal þeirra úrræða sem við höfum beitt er að takmarkað hljóðstig á hljóðkerfi vissa staða og í einhverjum tilvikum höfum við takmarkað opnunartíma skemmtistaðarins,“ segir Helgi.
Hægt er að lesa um málið á Fréttablaðinu.
