Ragnhildur Sverrisdóttir, almannatengill og fyrsta konan sem var kosin í sjórn Samtakanna 78 óskaði eftir svörum á Facebook síðu sinni frá frambjóðendum á vinalistanum sínum um hvort regnboginn fái að vera áfram á neðanverðum Skólavörðustíg.
Regnboginn hefur orðið tákn LGBTQ hreyfingarinnar og segir Ragnhildur að hann hafi fengið varanlegan sess árið 2019, en nú virðast nýjar hugmyndir að skipulagi götunnar ekki gera ráð fyrir honum.
„Það sem verra var, enginn virtist hafa leitt hugann að regnboganum, en svo fór hver um annan þveran að lofa því að honum yrði alveg örugglega komið vel fyrir á einhverjum öðrum stað, einhvern tímann,“ segir Ragnhildur og óskar svo eftir svörum frá frambjóðendum í Facebookvinahópi: „Munt þú leggja þig fram um að tryggja að regnbogi hinsegin fólks verði áfram á Skólavörðustíg?“
Þórdís Sigurðardóttir sem sækist eftir oddvitasæti Viðreisnar í Reykjavíkurborg svarar kalli Ragnhildar og segir: „Ég skal mála hann sjálf - i alvöru“.
Pawel Bartoszek borgarfulltrúi Viðreisnar segist ætla leggja fram tillögu á næsta fundi skipulagsráðs að það verði myndaður hópur með aðkomu Borgarhönnunar, Mannréttindarskrifstofu, Hinsegin daga og Samtakanna 78 sem gera tillögu að varanlegri staðsetningu Regnbogans.
„Ég hef borið erindisbréfið undir alla og skynja góðan anda í að vinna þetta hratt og vel og í breiðri sátt,“ segir Pawel.
