Þjóðverjar voru niðurlægðir af herjum Napóleons sem gengu svo langt að fjarlægja fereykið ofan af Brandenborgarhliðinu og flytja til Parísar. Á þeim tíma voru frönsk menningaráhrif yfirgnæfandi á meginlandi Evrópu. Þarna er að finna eina meginástæðu þess að Þjóðverjar hófu leit að rótum eigin menningar sem rak þá alla leið til Íslands.
Þetta er meðal þess sem fram kemur í máli dr. Árna Björnssonar, menningarsagnfræðings, en hann verður gestur Björns Jóns Bragasonar í þættinum Sögu & samfélagi í kvöld. Þar ætlar Árni að reifa tilgátu sína um það hvers vegna Íslendingar rituðu svo mjög á eigin þjóðtungu á síðmiðöldum, ólíkt öðrum þjóðum í norðurhluta álfunnar.
Árni mun einnig segja frá rannsóknum sínum á Niflungahring Richards Wagners, en þær leiddu í ljós að 80% aðfengra heimilda hafði Wagner úr forníslenskum sögum. Íslenskar sögur og íslensk kvæði gerðu Þjóðverjar jafnvel að sínum, en Jakob Grimm kallaði norrænu goðafræðina „Deutsche Mythologie“.
Sjálfur var Wagner ljóðskáld og orti undir fornyrðingslagi, svo mjög var hann undir áhrifum af fornum íslenskum kveðskap. Og Árni bendir á að heildarsýn og boðskapur Niflungahringsins endurspegli þá sýn sem fram kemur í Völuspá; um bölvun gullsins, svik og meinsæri og loks ragnarök, en óljósa von um endurlausn. Í kvæðinu felist því ekki hetjudýrkun eða óður til stríðsrekstrar.
Hringbraut í kvöld kl. 21.30.
