Kristinn Hrafnsson, ritstjóri Wikileaks, líkir vinnu Þorbjörns Þórðarsonar, fyrrverandi fréttamanns Stöðvar 2, fyrir Samherja við kamarhreinsun. Tilefnið er myndbandið sem kom út frá fyrirtækinu á dögunum en Stundin fullyrðir að Þorbjörn hafi komið við sögu í gerð myndbandsins.
Líkt og alþjóð man líklegast er því haldið fram í myndbandi Samherja að Helgi Seljan hafi árið 2012 byggt umfjöllun sína um meint brot Samherja á gjaldeyrislögum á breyttum og/eða fölsuðum gögnum sem sögð voru frá Verðlagsstofu skiptaverðs.
Þorbjörn Þórðarson var fenginn til ráðgjafar Samherja síðasta haust. Var það í kjölfar umfjöllunar Kveiks, Stundarinnar, Wikileaks og Al Jazeera um meintar mútugreiðslur fyrirtækisins til stjórnarmanna í Namibíu til þess að komast yfir hestamakrílskvóta þar í landi.
Kristinn Hrafnsson fer hörðum orðum um þátt Þorbjörns í gerð myndbandsins og störf hans fyrir Samherja. Hann nefnir fréttamanninn ekki á nafn en nokkuð ljóst að þar á hann við Þorbjörn.
„Fjóshaugurinn tók jóðsótt og fæddi lítinn lort. Þorsteinn Már og hans samherjar náðu ekki að kasta honum langt og sitja sjálfir með hann í fanginu. Sjónvarp Samherja skorar ekki hátt þótt hún skreyti sig fyrrverandi rannsóknarlögreglumanni sem stökk yfir gerðið og gékk í liðsveit hinna,“ skrifar Kristinn.
„Né heldur er skraut í starfi fréttamannsins fyrrverandi sem sérhæfir sig nú í einhverju sem kalla má almannatengslalögfræði sem tengist sannleiksleit blaðamennskunnar jafnmikið og kamarhreinsun kokkastarfi.“
