Tómas Guðbjartsson eða Lækna-Tómas segir í færslu á Facebook að það sé sorglegt að horfa upp á bráðamóttökuna sökkva í sæ. Hann kallar eftir þverpólitískri sátt til þess að leysa vandann.
Fréttablaðið greindi frá þessu.
Undanfarið hefur verið mikið fjallað um bága stöðu bráðamóttökunnar, en nokkrir hjúkrunarfræðingar hafa sagt starfi sínu lausu vegna slæms ástands.
„Þetta er ein af lykildeildum sjúkrahússins sem hefur verið ströggla svo árum skiptir - aðallega vegna flæðisvanda sem rekja má til úrræðaleysis í vistunarmálum aldraðra annars staðar í heilbrigðiskerfinu, þ.e. vandi sem orðið hefur til utanhúss. Sjúklingar eru því bókstaflega vistaðir á göngum bráðamóttökunnar. Vaxandi mannekla bætist síðan ofan á "flæðisvandann" - sem m.a. stafar af ófullnægjandi kjörum hjúkrunarfólks og aðstöðuleysis í úr sér gengnu húsnæði," segir Tómas.
Hann segir að það sé þjóðarskömm að ekki sé gripið til alvöru úrræða til að leysa málin.
„Ekki verður við sprækan forstjóra spítalans og heilbrigðisráðherra að sakast. Þeir hafa virkilega reynt. Þeir hafa virkilega reynt - en kalli þeirra virðist ekki svarað. Nú þarf þverpólitíska sátt um að gera betur í kerfi sem er það alvarlega statt að lykildeildir flaggskips þess - eins og bráðamóttaka spítalans - þurfa á gjörgæslu að halda,“ segir Tómas.
„Hvers eiga sjúklingar þessa lands - sem oftar en ekki eru aldraðir - að gjalda ? Er þetta þjónustan sem við viljum bjóða upp á? Eða ætlum við Íslendingar að falla um deild og bjóða í framtíðinni upp á annars flokks heilbrigðisþjónustu?,“ segir hann að lokum.
Greinina í heild sinni má lesa á Fréttablaðinu.
