Það er óhætt að segja að það hafi verið algjör tilfinningarússíbani þegar hljómsveitin Celebs komst óvænt í úrslitakvöld Söngvakeppninnar 2023. Celebs tók þátt í fyrra undanúrslitakvöldinu, en komst ekki beint áfram þar sem það munaði tveimur atkvæðum á þeim og næsta keppanda.
Celebs er skipað systkinunum Valgeiri Skorra, Hrafnkeli Huginn og Kötlu Vigdísi. Þau voru að horfa á seinna undanúrslitakvöldið saman í gærkvöldi, ásamt öllum sem komu að atriðinu þeirra.
Í samtali við Fréttablaðið segir Katla að þau séu glöð að hafa komist áfram og ætla þau að mæta með krafti í Söngvakeppnishöllina í úrslitunum.
„Við eins og allir sem að komust áfram bara þvílíkt glöð með þetta. Í skýjunum bara. Það er sérstakt að komast svona áfram, það er smá öðruvísi en að komast áfram á kvöldinu sjálfu,“ segir Katla sem var virkilega hress með ákvörðun framkvæmdarstjórnarinnar að hleypa þeim í úrslitin.
„Við erum búin að vera í einhverju rosalegu limbói í viku, algjör tilfinningarússíbani. En það er mjög ánægjulegt að svona hafi farið,“ segir Katla.
Að hennar sögn vissi hljómsveitin ekki af fyriráætlunum framkvæmdarstjórnar Söngvakeppninnar fyrr en það var tilkynnt í sjónvarpinu.
„Í fullri hreinskilni vissum við ekki neitt. Þessi ákvörðun er í alvöru tekin on the spot. Við vorum að horfa heima, mjög spennt. Ég held að við höfum fengið skilaboð mínútu áður en þetta var tilkynnt „Eru þið að horfa?". En það var engin með símann sinn uppi því við vorum a horfa á sýninguna,“ segir Katla.
En þegar Ragnhildur Steinunn, einn af kynnum kvöldsins var að fara tilkynna hvaða atriði færi með í úrslitin datt netið út heima hjá systkinunum.
„Um leið og Ragnhildur sleppir orðinu um hvaða aukalag færi með í úrslitakvöldið, þá stoppaði útsendingin hjá okkur og netið datt út. Loksins fór útsendingin aftur á stað og þá fengum við skilaboð frá fólki að óska okkur til hamingju. Þannig við vorum bara „hvað er að gerast?". Þetta voru rosalegar tvær mínútur,“ segir Katla.
Hægt er að lesa meira hér.
