Katrín Jakobsdóttir, forsætisráðherra Íslands, fagnar þeim málum sem afgreidd voru á Alþingi í dag.
„Þar langar mig sérstaklega að nefna aðgerðaráætlun í málefnum hinsegin fólks fyrir tímabilið 2022 til 2025.
Áætlunin er söguleg að því leyti að hún er sú fyrsta í sögunni hér á landi sem snýr eingöngu að málefnum hinsegin fólks,“ skrifar Katrín.
„Áætlunin er liður í því að koma Íslandi í fremstu röð í málefnum hinsegin fólks. Í því samhengi finnst mér ánægjulegt að sjá hvað þær ákvarðanir sem við tökum hér á Alþingi skipta miklu máli en á síðasta ári fór Ísland upp um fimm sæti á Regnbogakorti ILGA-Europe og þar skipta lög um kynrænt sjálfræði sem sett voru hér á landi 2019 máli en þau hafa komið til móts við ný og breytt viðhorf til opinberrar skráningar kyns og stuðlað að réttarbótum fyrir trans og intersex fólk.
Aðgerðaáætlunin boðar enn frekari framfarir fyrir mannréttindi hér á landi,“ bætir Katrín við.
Þá er hún einnig stolt af því að mál hennar um minnisvarða um eldgosið við Heimaey hafi verið samþykkt en á næsta ár verða 50 ár liðin frá Heimaeyjargosinu.
„Þeirra tímamóta verður minnst með margvíslegum hætti og ánægjulegt að skynja áhuga og samstöðu á Alþingi um þetta mál.“
Um 2,5 prósent þjóðarinnar, heimilislausar í einni svipan
Í febrúar var greint frá því að Ólafur Elíasson myndi gera minnisvarðann sem verður reistur 3. júlí 2023.
„Fáir atburðir mörkuðu jafn djúp spor í sögu Íslands á liðinni öld og eldgosið á Heimaey sem hófst þann 23. janúar 1973 og lauk í byrjun júlí sama ár. Heimaeyjargosið er eina eldgosið sem hafist hefur í byggð á Íslandi og urðu 1.350 fjölskyldur, um 2,5 prósent þjóðarinnar, heimilislausar í einni svipan þegar 1,6 km gossprunga opnaðist við bæjardyr Vestmanneyinga,“ segir í greinargerð Katrínar.
Eldgosið hafi ekki bara verið áfall fyrir íbúa Heimaeyjar heldur einnig efnahagslegt högg fyrir Ísland þar sem Vestmannaeyjar voru stærsta verstöð landsins sem skapaði um 12 prósent útflutningstekna. Vestmanneyingar fengu gríðarlega aðstoð alls staðar frá en engin þjóð gerði eins mikið og Norðmenn en þeir voru nánast tilbúnir til að taka við öllum Vestmanneyingum ef á hefði þurft að halda.
Katrín segir mikilvægt að minnast gossins með myndarlegum hætti svo að minningin um einstök afrek og þá miklu samkennd sem ríkti við einkar krefjandi aðstæður fái lifað um ókomna tíð.
