Tónlistarmaðurinn Logi Pedro Stefánsson deildi nýverið færslu á Facebook þar sem hann gagnrýnir aðferðir sem lögreglan beitir þegar lýst er eftir einstaklingum á samfélagsmiðlum.
Fyrr í dag greindi Fréttablaðið frá því að sextán ára unglingur var stöðvaður í strætó af sérsveit ríkislögreglustjóra vegna leitar að strokufanganum Gabríel Duoane Doama en drengurinn er dökkur á hörund líkt og Gabríel.
„Það er óásættanleg sturlun að vopnuð sérsveit fari í aðgerðir og fjarlægi 16 ára barn, einungis af því að það er með sömu klippingu og eftirlýstur einstaklingur,“ segir Logi og kallar eftir skýrum verklagsbreytingum og afsökunarbeiðni frá lögreglunni og viðbrögð frá æðstu ráðamönnum þjóðarinnar.
Í tilkynningu sem lögreglan hefur sent frá sér vegna málsins kemur fram að drengurinn hafi ekki verið fjarlægður úr vagninum: „För vagnsins var stöðvuð en þegar sérsveitarmenn fóru inn í vagninn þá sáu þeir strax að ekki var um að ræða einstaklinginn sem var verið að leita að og yfirgáfu þeir því vagninn.“
Færsluna má sjá hér fyrir neðan.
