Leikhúsgagnrýnandinn Jón Viðar Jónsson segist vera sammála Birnu Hafsteinsdóttur, formanni félags íslenskra listamanna um að hið opinbera geri úttekt á hvernig samningamálum sé háttað hjá Íslensku óperunni.
Mikið hefur verið rætt um málefni Óperunnar eftir að söngkonan Þóra Einarsdóttir vann mál sitt gegn Íslensku óperunni.
Í færslu á Facebook segir Jón að hann sé sammála Birnu, en spyr sig svo hvort það sé nauðsynlegt að halda úti stofnun sem heldur svo fáar sýningar.
„Tek undir með Birnu Hafstein. En það er ekki nóg að ræða samningsmál Íslensku óperunnar. Svo þarf að ræða hvort virkilega þurfi að halda hér úti heilli stofnun sem setur ekki meira en í langmesta lagi tvær fullgildar óperusýningar á ári.“
