Jóhannes segir prófkjöri Miðflokksins í Reykjavík hafa verið stolið: Miðflokksmenn í áfalli

Jóhannes Lofts­son segir að fé­lags­próf­kjöri hjá Mið­flokknum í Reykja­vík hafi verið stolið af flokks­stjórn flokksins. Jóhannes, sem áður var í flokknum Á­byrg fram­tíð, hafði boðið sig fram í odd­vita­sætið en nú­verandi odd­viti til­kynnti fyrr í mánuðinum að hún ætlaði ekki að sækjast eftir því aftur.

Til­kynnt var í gær á vef flokksins að fé­laga­próf­kjöri væri af­lýst og að fram­bjóð­endur ætluðu að vinna saman. Efstur þar á lista er Ómar Már Jóns­son, Jó­steinn Þor­gríms­son er í því öðru og svo Sól­veig Daníels­dóttir í því þriðja. Fram kemur á vefnum að þau hafi ein sóst eftir þessum sætum og því ekki þörf á próf­kjöri.

Jóhannes segir hins vega á Face­book-síðu sinni að það hafi ekki verið mót­fram­bjóð­endur því að það hafi eitt­hvað „skrítið“ gerst eftir að fram­boðs­frestur rann út á mið­viku­dag.

„ Nú veit ég lítið hvað gerðist bak við tjöldin, enda ekki sér­lega vanur svona innan­flokks­pólitík og lítt gefinn fyrir bak­tjalda­makk. En at­burða­rásin sem hófst um kvöldið eftir að fram­boðs­frestur rann út var ansi sér­stök,“ segir Jóhannes í færslunni.

Hann segir að hann hafi fengið tölvu­póst frá mið­stjórn eftir að frestur rann út þar sem hann var beðinn um upp­lýsingar til að sanna að hann væri ekki lengur tengdur Á­byrgri fram­tíð auk þess sem hann fékk að vita að hann væri ekki enn orðinn með­limur flokksins, þrátt fyrir að hann væri að sækja eftir odd­vita­sæti innan hans.

„Ég get því ekki með nokkru móti séð annað en að þessi gjörningur stjórnar Mið­flokksins sé í senn ó­lög­mætur og gerður með á­setningi til að komast hjá því að halda fé­laga­próf­kjör um odd­vita,“ segir Jóhannes í færslu sinni og að bæði sé um að ræða að­för að lýð­ræðinu og fé­laga­frelsis­á­kvæði stjórnar­skrárinnar.

Hann segist ekki einn um þessa skoðun því tveir aðrir fram­bjóð­endur hættu við fram­boð sitt eftir að hafa heyrt af því hvernig komið var fram við hann. Í at­huga­semdum við færsluna segir Anna Björg Hjartar­dóttir að hún sé ein þeirra sem að hafi dregið sitt fram­boð til baka en hún hafði sóst eftir öðru sætinu og segir að það sama gildi um mann­eskjuna sem sóttist eftir því þriðja.

„Trúi varla enn­þá að þetta hafi gerst og mið­flokks­menn eru al­mennt líka í á­falli. Er sjálf for­maður Mið­flokksins í Reykja­vík suður og fannst Jóhannes því­líkur fengur fyrir Mið­flokkinn,“ segir Anna Björg.