Ingibjörg Sólrún Gísladóttir, fyrrverandi forstjóri lýðræðis- og mannréttindaskrifstofu Öryggis- og samvinnustofnunar Evrópu, hefur gagnrýnt forseta Mannréttindadómstóls Evrópu, Róbert Spanó, fyrir að hafa tekið við heiðursdoktorsnafnbót í Háskólanum í Istanbúl síðastliðinn fimmtudag en bæði viðurkenningin og heimsókn Róberts til Tyrklands hefur sætt mikilli gagnrýni.
„Mikið finnst mér dapurlegt að fylgjast með heimsókn Róberts Spanó, forseta Mannréttindadómstóls Evrópu, til Tyrklands. Hann ætti að vita það manna best að það vantar mikið upp á að mannréttindi séu virt og farið sé að reglum réttarríkisins í Tyrklandi,“ segir Ingibjörg í færslu um málið á Facebook síðu sinni.
Hún vekur athygli á því að þrátt fyrir að fjögur ár séu liðin frá valdaránstilrauninni árið 2016 sé enn verið að ásaka ýmsa um að tengjast hryðjuverkasamtökum fyrir það eitt að láta skoðun sína í ljós. „Óvíða eru jafn margir blaðamenn á bak við lás og slá og fjöldinn allur af dómurum og háskólakennurum hafa verið reknir og sóttir til saka á þeirri forsendu að þeir séu hliðhollir hryðjuverkamönnum.“
„Nú kemur forseti Mannréttindadómsstólsins til Tyrklands, hittir forsetann og aðra ráðamenn og þiggur heiðursdoktorsnafnbót úr þeirra hendi en mannréttindafrömuðirnir, gagnrýnu blaðamennirnir og fulltrúar frjálsu félagasamtakanna fá hvergi að koma nærri,“ segir Ingibjörg enn fremur.
Fréttablaðið greindi frá því fyrir helgi að í ávarpi sínu hafi Róbert sagt að löng hefð væri fyrir því að forseti Mannréttindadómstóls Evrópu taki við heiðursdoktorsnafnbót og að slíkum heiðri hafi hingað til aldrei verið hafnað. Þá sagði hann í samtali við Fréttablaðið að málið hafi verið skoðað gaumgæfilega.
„Mér er til efs að það sé hefð fyrir að þiggja [nafnbótina] í ríki þar sem staða mannréttinda er með þessum hætti og hið akademíska frelsi jafn bágborið og það er í Tyrklandi,“ segir Ingibjörg. „Mér er nær að halda að það hafi verið fordild en ekki hefð sem réði því að Róbert Spanó þáði þessa vegtyllu.“
