„Alveg er með hreinustu ólíkindum að fólk skuli komið í hár saman út af íslenskukennslu fyrir útlendinga, ekki síst verkafólk,“ segir Illugi Jökulsson, þjóðfélagsrýnir, rithöfundur og fyrrverandi blaðamaður.
Greint var frá því í gær að það væri ekki ofarlega á lista verkalýðshreyfingarinnar að gera þá kröfu í kjarasamningum að erlendu starfsfólki yrði gefinn kostur á íslenskukennslu á vinnutíma. Áður hafði Eiríkur Rögnvaldsson, fyrrverandi íslenskuprófessor, sagt að upplagt væri að verkalýðshreyfingin gerði þá kröfu í komandi kjarasamningum að erlendu vinnuafli yrði gefinn kostur á íslenskukennslu á vinnutíma.
Sólveig Anna og Eiríkur skiptust á skotum í kjölfarið; Sólveig Anna spurði á hvaða vegferð Eiríkur væri, undarlegt væri að einhver „menntaelíta“ ætlaði sér að setja ábyrgðina á verkalýðsfélög verka- og láglaunafólks. Eiríkur svaraði í samtali við mbl.is að tillagan snerist einmitt um að setja ábyrgðina ekki á verkalýðsfélög og gagnrýndi hann Sólveigu fyrir orðanotkun sína.
Illugi segir að það segi sig sjálft að að auðvitað hljóti það að bæta líðan og lífsgæði og líka kjör vinnandi fólks frá útlöndum að kunna svo og svo mikið í íslensku.
„Það þarf ekkert að orðlengja hvað það er mikilvægt mál. Ég ætla rétt að vona að enginn amist við því á nokkurn einasta hátt. En það segir sig líka sjálft að verkalýðshreyfing sem lítur svo á að hún sé nú í nauðvörn fyrir félagsmenn sína í vaxandi verðbólgu og ónýtu húsnæðiskerfi, hún setur íslenskukennsluna kannski ekki alveg í ýtrasta forgang fyrir sitt fólk akkúrat í augnablikinu. Að fólk sé farið að rífast um þetta er ótrúlegt. Finnið bara leiðir til að berjast saman bæði fyrir bættum kjörum og betri íslenskukennslu. Það getur ekki verið svo erfitt.“
