Íbúi í Breiðholtinu lýsir yfir miklum áhyggjum af aukinni mótorhjólanotkun ungmenna í hverfinu. Hann segir unglingana gjarnan hjálmlaus og segir þá ítrekað keyra á göngustígum með þeim afleiðingum að gangandi vegfarendur hafa átt fótum sínum fjör að launa.
Íbúinn vill ekki láta nafn síns getið en sendi Hringbraut ábendingu um málið í kvöld. Hann segir ekki langt að bíða þar til alvarlegt slys verður í hverfinu. Honum finnst lögreglan áhugalaus um málið.
„Þau bruna um göngustígana, milli garða og leikvalla á ógnarhraða, kannski nokkur saman í röð og hægja ekki endilega á sér þegar þau nálgast aðra vegfarendur. Stundum höfum við orðið vör við motocross hjól hérna líka, inni í miðju íbúðarhverfi og með tilheyrandi hávaða, jafnvel seint á kvöldin. Við höfum tvisvar hringt á lögreglu vegna krossarans en aldrei orðið vör við nein viðbrögð frá þeim,“ segir íbúinn.
„Ég man eitt sinn eftir að hafa séð ófríska konu á göngu í hverfinu sem þurfti að víkja fyrir tveimur vespum á ógnarhraða. Svo man ég sjálfur eftir því að hafa verið úti að ganga með son minn sofandi í vagni þegar hann var bara nokkurra mánaða gamall,“ segir íbúinn.
Atvikið hafi átt sér stað við Höfðabakka í Breiðholtinu.
„Ég geng niður brattan, þröngan göngustíg sem liggur niður að Höfðabakka (hraðbraut) með podcast í eyrunum, þegar þrjár vespur þjóta skyndilega fram hjá okkur á alveg svakalegum hraða. Eitt hjólanna var svo nálægt mér að það rétt snerti úlpuna mína og þau hægðu ekkert á sér. Mér brá svo að ég var næstum búinn að missa tak á vagninum, sem þá hefði væntanlega þotið á undan mér niður brekkuna og beint á hraðbrautina fyrir neðan okkur,“ segir íbúinn.
„Ég er hræddur um að það verði ekkert gert í þessu fyrr en að eitthvað alvarlegt kemur fyrir. Hér er mikið um græn svæði og leikvelli milli blokkanna og fullt af börnum á öllum aldri úti að leika sér sem ættu að vera örugg á göngustígunum í hverfinu sínu.“
