Hjörtur Sveinsson deildi nýverið reynslusögu á Facebook-hópinn Vertu á verði – eftirlit með verðlagi. Þar bað hann fólk um að vera á verði þegar að sjálfsafgreiðslukössunum hjá Nettó í Mjódd.
„Passið að skoða verðin sem koma inn á sjálfsafgreiðslukössunum hjá Nettó í Mjódd, allt í klessu!!!,“ segir Hjörtur.
„Skannaði lambahrygg inn í búð sem var svo tæplega 1.000.- kr. dýrari á kassanum. Mjög hjálplegur starfsmaður leiðrétti verðið en þegar ég skannað svo tikka masala sósu sem kostaði 284.- kr. þá var heildarverðið komið í um 8.200.- kr.,“ segir Hjörtur, sem færði sig þá yfir á annan kassa.
„Prufaði annan kassa en sama ruglið kom upp. Loksins hafðist að fá rétt verð í gegn á starfsmannakassanum, heildarverðið var 7.803.- en hefði endað í rúml. 10.400.- kr. án leiðréttingar,“ segir Hjörtur.
Í athugasemdum á færslunni voru margir sem höfðu lent í hremmingum með sjálfsafgreiðslukassana.
„Afsakið en ég á ekkert fallegt til í pokahorninu fyrir þá sem stunda þetta sjálfsafgreiðsludrasl,“ segir einn.
„Það er oft sem að vörur á tilboði koma bara inn á tilboði á venjulegu kössunum en ekki sjálfsafgreiðslu kössunum fáránlegt kerfið hjá þeim,“ segir annar meðlimur hópsins.
Fólk ætti því að hafa augun opin þegar það fer næst í búðina.
