Ólafur Stephensen, framkvæmdastjóri Félags atvinnurekenda hefur aftur beint spjótum sínum að Ágústi Andréssyni, yfirmanni kjötafurðastöðvar Kaupfélags Skagfirðinga fyrir að hafa ekki afsalað sér heiðurskonsúlatigninni sem rússnesk stjórnvöld úthlutuðu honum.
Hann hafði áður gagnrýnt Ágúst og KS fyrir tengingar sínar við Rússland.
„Það er einmitt það. Nokkur íslenzk fyrirtæki fá falleinkunn fyrir viðbrögð sín við innrás Rússlands í Úkraínu,“ segir Ólafur og deilir frétt Viðskiptablaðsins sem segir frá íslenskum félögum á svörtum lista prófessors við bandaríska háskólann Yale School of Management.
Þá bendir hann á að félagið hefði brugðist harðar þegar Vitalia Lazareva ásakaði Arnar Grant um ofbeldi: „Þegar Arnar Grant, samstarfsaðili KS, var sakaður um ofbeldi í byrjun árs, brást kaupfélagið hratt við og vildi ekki láta tengja sig við slíkt. KS gaf út yfirlýsingu um að samstarfinu við Arnar væri slitið og íþróttadrykkurinn Teygur yrði tekinn úr sölu,“ segir Ólafur og telur að KS finnist í lagi að vera tengd við Rússa.
„Margsannað og yfirgengilegt ofbeldi Rússlands í Úkraínu (þar með talið ólýsanlegt ofbeldi gegn úkraínskum konum) gefur kaupfélagsmönnum hins vegar enga ástæðu til að hugleiða einu sinni tengsl sín við rússnesk stjórnvöld,“ segir Ólafur og spyr að lokum:
„Í hverju ætli munurinn liggi?“
