Leikarinn og leikstjórinn Björk Jakobsdóttir sendi nýverið frá sér langan pistil á Facebook síðu sinni þar sem hún talar gegn slaufunarmenningu eða „cancel culture“.
„Elsku samlandar. Ég skrifa eftirfarandi orð vitandi að það getur kostað mig útskúfun og bannfæringu hjá ákveðnum hópi. Hjarta mitt grætur í hvert skipti sem nýr einstaklingur er tekinn af lífi á samfélagsmiðlum,“ segir hún meðal annars í löngum pistli sem er kominn með hátt í tvö þúsund „like“.
„Við erum öll mannleg og ekkert okkar er fullkomið. En af einhverjum ástæðum gerum við þá kröfu í dag; á tímum samfélagsmiðla, að enginn skuli nokkurn tímann stíga feilspor. Hvort sem það er að tjá ranga skoðun, segja óviðeigandi brandara eða gera eitthvað sem telst kynferðisleg áreitni,“ segir hún og heldur því fram að henni líði oft eins og hún sé komin í unglingadeild aftur þar sem vinsæla liðið ákveður hvern á að leggja í einelti.
Hún segir að unga kynslóðin stjórni oft umræðunni „Stundum vildi ég bara að þetta unga baráttufólk fengi lánaða smá lífsreynslu og umburðalyndi frá okkur sem eldri erum,“ segir hún og heldur áfram “Því ég veit að flest ungmenni hafa ekki séð alla lífsins liti – og sjá hlutina stundum í svörtu eða hvítu. Eftir töluverða lífsreynslu veit ég að hlutirnir eru sjaldnast svartir eða hvítir heldur eru allskonar gráir tónar til líka.“
Þá segir hún að það er ekki hægt að setja allar upplifanir undir sama hattinn „Mismunandi upplifun, misskilningur, samskiptaleysi og kannski óviðeigandi hegðun sem er ekki nauðgun. Við megum ekki gjaldfella alvarlega ofbeldisglæpi með því að kalla allt nauðgun eða kynferðisafbrot.“
Pistilinn í heild má sjá hér fyrir neðan.
