Frá því að framleiðslu á Bláum Opal var hætt árið 2005 hafa fjölmargir kallað eftir því að Nói Síríus komi aftur með nammið en í gegnum tíðina hafa gamlir pakkar af Bláum Opal selst fyrir háar fjárhæðir á netinu. Einn slíkur pakki seldist á 16 þúsund krónur á dögunum en sá var frá árinu 1974.
Auðjón Guðmundsson, framkvæmdastjóri markaðs- og sölusviðs Nóa Síríus, segir í samtali við Fréttablaðið að slíkir pakkar komi reglulega upp. „Þannig að ef einhver lumar á gömlum pakka, þá virðist það verið einhver besta fjárfesting sem menn hafa komist í,“ segir Auðjón.
Hann útilokar ekki að Blár Opal verði framleiddur á ný en Nói Síríus hafa síðastliðin ár reynt að hafa upp á einu aðalbragðefninu sem var í þeim gamla, klóróformi. Árið 2016 var talað um að von væri á Bláum Opal á ný en það rættist ekki.
„Við erum alltaf að reyna að finna lausn á þessu óskabarni þjóðarinnar. Við höfum mikið leitað að bragðefni sem nær ekki einungis sama bragði, heldur sömu tilfinningu og Blár Opal gaf. Þessi leit er þrautinni þyngri,“ segir Auðjón við Fréttablaðið.
Þá bætir hann við að þau hafi alls ekki gefist upp og aldrei að vita hvort nammið komi í verslanir á ný. „En okkur dettur ekki í hug að koma með vöru sem er ekki alveg eins og gamli Blái, þá værum við bara að gera þjóðinni óleik.“
