„Ef fjölmiðlar vakna ekki, er hætt við að við séum að sigla inn í alheimsku þar sem yfirvöld sækja sér ótakmörkuð völd í krafti þess að þau séu að verja okkur fyrir óskilgreindri ógn,“ segir Gunnar Smári Egilsson varðandi umfjöllun um nýjasta afbrigði Covid-veirunnar, Omíkron.
Gunnar segir eitthvað bogið við fréttaflutninginn um afbrigðið, það sé í miklum hamfaragír þrátt fyrir að mikið sé af mikilvægari málefnum þessa dagana, samkvæmt honum.
„Samkvæmt fréttum veit enginn enn hvort fólk smitist frekar af omíkron en af öðrum afbrigðum cóvid, né hvort fólk verður veikara eða líklegra til að deyja. Samt er okkur sagt frá ferð omíkron um heiminn eins og frönsk dagblöð sögðu frá ferð Napóleon frá Elbu til Parísar; óargadýrið tekur land í Golfe-Juan, skepnan svaf í Grenoble, harðstjórinn fór um Lyons, valdaræninginn stefnir á Dijon,“ segir Gunnar.
„Ef fjölmiðlar vakna ekki, er hætt við að við séum að sigla inn í alheimsku þar sem yfirvöld sækja sér ótakmörkuð völd í krafti þess að þau séu að verja okkur fyrir óskilgreindri ógn,“ segir Gunnar og líkir því við því valdi sem Bandaríkin beisla í baráttunni gegn hryðjuverkum og fleiru.
Samkvæmt Gunnari má strax marka afleiðingarnar hér heima. „Flokksformennirnir þrír sátu til dæmis í Ráðherrabústaðnum um daginn og stokkuðu upp stjórnarráðið án þess að ræða við nokkurn mann, hvorki starfsfólk né verðandi ráðherra, alsannfærð um takmarkalaust umboð sitt, eins og Guð hefði valið þau til að stjórna,“ segir Gunnar.
„Í umhverfi þar sem sífellt er hamrað á stríðsástandi og ógn, sífellt leitað til yfirvalda um vernd og aðgerðir, þar grasserar fasisminn og valdboðið í litla heila ráðafólks, alræðið skýtur rótum,“ segir Gunnar.
Að lokum segir Gunnar fjölmiðlafólki að hætta í hamfaragírnum áður en skaðinn verður meiri. „Ykkar hlutverk er ekki að teikna upp ógn og selja almenningi þá hugmynd af yfirvöld eigi að vernda okkur. Ykkar hlutverk er að greina samfélagið, rekja afleiðingar ákvarðana valdsins og gefa almenningi rödd,“ segir Gunnar.
