Gunnar Þorsteinsson, oftast kenndur við Krossinn, saknar Jónínu Ben heitinnar, fyrrverandi eiginkonu sinnar, mjög. Þau hafi ætlað að taka aftur saman skömmu fyrir andlát hennar. Þessu greinir Gunnar frá í viðtali við Mannlíf.
Gunnar segir að þau fyrrum hjónin hafi verið góðir vinir. Jónína hafi verið afburða greind og þau áttu vel saman. Þrátt fyrir það skildu leiðir þeirra en Gunnar segist að ástin hafi aldrei fölnað: „Það voru aðstæður sem ollu því. Það var ekki það að ástin væri ekki til staðar. Það var ekki vandamálið. Við skildum aldrei en fórum í sundur en töluðum saman á sirka tveggja tíma fresti alla daga. Það var aldrei þögn eða aðskilnaður í þeim skilningi,“ segir Gunnar um skilnaðinn.
Hann segir þau hafa kynnst í gegnum detoxið: „Ég kynntist henni þegar hún var að auglýsa detox; það var viðtal við hana einhvers staðar. Ég hringdi í hana og spurði hvort ég mætti koma með og fasta. Þetta var á mínum tíma; í byrjun janúar,“ segir Gunnar.
Hann kveðst hafa fastað um áratugabil: „Ég fasta alltaf í byrjun janúar og er búinn að gera þða í 43 ár. Þrjár vikur í senn. Þá borða ég ekkert; drekk bara vatn og þá hef ég oft verið á hótelum eða sumarbústöðum einhvers staðar,“ segir Gunnar. Hann heldur áfram: „Svo datt mér í hug að fara með hópnum. Ég gerði þetta tvisvar eða þrisvar og við kynntumst á þessum árum og það endaði með því að það kom upp hávær orðrómur í samfélaginu um að við værum par,“ segir Gunnar.
Hann segist í framhaldinu hafa boðið Jónínu í mat og það endaði með ást.
Þau urðu óaðskiljanleg þrátt fyrir aðskilnaðinn. Raunar ætluðu þau að taka aftur saman, skömmu fyrir andlát Jónínu: „Ég var í marga mánuði að ná huganum í lag. Hún hafði svo ríka nærveru í mínu lífi í um tíu ár, þannig að ég refereraði í huganum mikið til hennar. Og það var eiginlega erfiðasti hjallinn að losna undan því að láta minninguna bara vera ljúfa og á sínum stað,“ segir Gunnar.
