Guðmundur Guðmundsson, landsliðsþjálfari íslenska landsliðsins í handbolta var greinilega hrærður með stuðning íslensku stuðningsmannanna í Kristianstad í gærkvöldi.
Íslenska landsliðið hóf HM á afar góðum sigri gegn Portúgal í fyrstu umferð riðlakeppninnar.
Um spennuþrunginn leik var að ræða þar sem Strákarnir okkar sýndu mátt sinn og megin á lokamínútunum og unnu að lokum fjögurra marka sigur 30-26.
Gríðarleg stemning var á meðal íslenskra stuðningsmanna í Kristianstad Arena í gærkvöldi eftir að Strákarnir okkar sigruðu sinn fyrsta leik á HM gegn Portúgal. Hátt upp í tvö þúsund Íslenskir stuðningsmenn voru mættir í stúkuna á Kristianstad Arena og létu vel í sér heyra á meðan á leik stóð sem á eftir leik.
Eftir leik fór síðan gæsahúð um alla íslensku þjóðina þegar að stuðningsmenn Íslands tóku að syngja lagið Ég er kominn heim sem hefur orðið einhvers konar þjóðsöngur stuðningsmanna íslensku landsliðanna í boltaíþróttum.
Myndirnar sem RÚV skilaði heim til þjóðarinnar í gegnum sjónvarpið frá Kristianstad voru magnaðar og mátti sjá tárvotan Guðmund virkilega hrærðan með stuðninginn sem liðið fékk.
Myndband af atvikinu má sjá hér fyrir neðan. Ísland á næst leik gegn Ungverjalandi á morgun klukkan 19:30.
