Náttfari 21. sept 2016
Guðlaugur Þór maður að meiri
Náttfari var mjög glaður að heyra þegar fréttir voru sagðar af því að Guðlaugur Þór Þórðarson hefði sagt sig frá pappír Vigdísar Hauksdóttur um gamla samninga um yfirfærslu eigna frá slitabúum föllnu bankanna til þeirra nýju. Það er meir í stíl við þá ímynd sem hann hefur sem réttsýnn og kraftmikill stjórnmálamaður.
Guðlaugur Þór byrjaði á því að biðja þá embættismenn afsökunar sem telja að pappírinn geymi bæði ærumeiðingar og landráðabrigsl. Síðan stígur hann það mikilvæga skref að segja sig með öllu frá skýrslunni. Í samræmi við það hefur hann lagt til að önnur þingnefnd skoði þær ákvarðanir sem teknar voru á sínum tíma í tengslum við stofnun nýju bankanna. Þar með segir hann að skýrsla Vigdísar svar ekki þeim spurningum.
Ýmsir fjölmiðlar reyna að gera lítið úr Guðlaugi fyrir að hafa stigið þessi skref. Reynt er að gera grín að honum með því að hann hafi halupið frá málinu. Þvert á móti á hann hrós skilið fyrir að sjá áður en í fullt óefni var komið að málatilbúnaðurinn var farsi og að betur færi á að önnur nefnd,sem Vigdís Hauksdóttir á ekki sæti í sem aðalmaður, taki hugsanleg álitaefni til meðferðar.
Þeir stjórnmálamenn sem sjá að sér í tíma eru menn að meiri. Það á við Guðlaug Þór í þessu tilviki.
