Arion banki og Íslandsbanki segja frumvarp ferðamálaráðherra um pakkaferðir ekki standast lög um greiðsluþjónustu eða alþjóðlega kortaskilmála en frumvarpið myndi heimila ferðaskrifstofum að endurgreiða fólki með inneignarnótu í stað peninga ef pakkaferð er ekki farin.
Í samantekt um frumvarpið á vef Alþingis segir:
„Lagt er til að ferðaskrifstofum verði heimilt að endurgreiða ferðamanni vegna pakkaferða, sem eru afpantaðar eða er aflýst og átti að fara á tímabilinu 15. mars til og með 30. júní 2020, með inneignarnótu, sem heimilt verði að innleysa að liðnum 12 mánuðum, eftir að tímabili því sem afmarkar óvenjulegar og óviðráðanlegar aðstæður skv. 3. mgr. er lokið hafi hún á þeim tíma ekki verið nýtt.“
Lögmaður Íslandsbanka greinir frá því í umsögn um frumvarpið að þeir sem greiða ferð með korti eigi endurkröfurétt en hann gildi aðeins í 18 mánuði.
„Algengt er að fólk borgi ferðir allt að ári áður en ferð er farin og margir ákveða vísvitandi að greiða með korti til að njóta þessara réttinda. Verði sú leið farin að afhenda inneignarnótu í stað endurgreiðslu má færa fyrir því rök að gengið sé á endurkröfurétt þeirra sem greiddu ferð sína með korti,“ segir í umsögninni.
Lögmaður Arion banka tekur í svipaða strengi. „Þá er ljóst að frestur korthafa til að gera endurkröfu getur verið liðinn ef miðað er við að frestur til að að innleysa inneignarnótuna sé allt að 12 mánuðir frá og með 30. júní n.k., ef síðar kæmi upp sú staða að söluaðili fer þrátt fyrir úrræði þetta í gjaldþrot eða rekstrarstöðvun.“
Þá segist Arion banki taka undir sjónarmið Neytendastofu um að neytendum sé ekki tryggðar fullar endurgreiðslu í samræmi við þau lög og skilmála sem í gildi voru þegar kaup áttu sér stað.
