Þórólfur Guðnason, sóttvarnalæknir, sagði í Sprengisandi á Bylgjunni í morgun að allt frá því að faraldurinn hófst í febrúar í fyrra hafi hann verið kaflaskiptur og erfitt að rýna i hann. Hann sagði að á meðan hjarðónæmi næst i heiminum munum við þurfa að glíma við faraldurinn og á von á því að það taki allt að tvö ár. Hann sagði að til þess að ná hjarðónæmi þurfi að leyfa veirunni að ganga áfram en á sama tíma koma í veg fyrir alvarleg veikindi viðkvæmra hópa. Þórólfur sagði ómögulegt að vita hversu langan tíma það tekur að ná hjarðónæmi en sagðist allt eins eiga von á því að það tæki allt frá nokkrum mánuðum upp í tvö ár.
57 smit
Alls greindust 57 smit í gær en aðeins 2.500 sýni voru greind. Um 40 prósent þeirra sem greindust voru í sóttkví.
Þórólfur sagði á Sprengisandi að þegar þau voru langt komin með bólusetninguna í lok júní hafi því stærsta spurningin verið hvort að það ætti að láta reyna á hjarðónæmið. Að opna samfélagið og slaka á takmörkunum.
Hann sagði að hann hafi alltaf verið undirbúinn fyrir það að eitthvað óvænt gæti gerst og það hafi gerst með útbreiðslu Delta-afbrigðisins og þegar bólusett fólk fór að smitast.
Hertar aðgerðir neyðarúrræði
Hann sagði ekki endilega þörf á hörðum aðgerðum núna en ef að smitfjöldinn verður mikið meiri og innlagnir alvarlegra veika þá sé ekkert annað í stöðunni.
„En það er algert neyðarúrræði að gera það,“ sagði Þórólfur.
Þórólfur sagði það forgangsverkefni að gefa þeim sem fengu Janssen bóluefnið annað skammt og að eldra fólk og fólk með viðkvæma sjúkdóma fengi örvunarskammt en það væri ekki forgangsverkefni að bólusetja alla með þriðja skammtinum.
Hann sagði að baráttan yrði þannig í framtíðinni að ný afbrigði koma fram og að það sé alltaf spurning hvernig bóluefnin svari þeim. Hann sagði að á meðan kórónuveirufaraldurinn geisar muni alltaf koma ný afbrigði en sagðist vona að þau verði ekki skæðari en Delta-afbrigðið.
„Þetta er ekki búið fyrr en þetta í búið í heiminum öllum,“ sagði Þórólfur og sagði að við þyrftum að komast að því hvernig lífi við viljum lifa á meðan það gerist.
Takmarkanir fyrir óbólusetta
Þórólfur var spurður um skoðun sína á því að einhverjar takmarkanir yrðu settar á þau sem ekki eru bólusett. Hann sagði að það þyrfti að skoða bæði lagalega og lögfræðilega en sagði að það þekktist vel erlendis að setja, til dæmis, reglur um bólusetningu á fjölmennum viðburðum.
Hann sagði að hér á landi væri þá, sem dæmi, hægt að hafa einhverja ákveðna fjöldatakmörkun en svo væri hægt að leyfa fjölmennari viðburði gegn því að allir sem mæti séu bólusettir eða hafi sýkst af veirunni.
Hægt er að hlusta á viðtalið hér í heild sinni á vef Vísis.
