Dómar fimm pólskra karlmanna voru birtir í Lögbirtingablaðinu í dag þar sem ekki hefur tekist að birta þeim dóminn. Allir fengu þeir dóm fyrir innflutning á OxyContin, en þeir komu til landsins í mars og apríl síðastliðnum. Fréttablaðið gerði málinu skil en RÚV greindi fyrst frá.
Mennirnir fimm komu til landsins með samtals fjögur þúsund töflur af OxyContin, en efnin höfðu þeir falið með mismunandi hætti: í nærbuxum, kaffipokum, sælgætispokum og jafnvel raksápubrúsa. Þetta kom fram í dómi á vefsíðu Héraðsdóms Reykjaness í lok september.
Tveir mannanna komu með sama flugi frá Gdansk í Póllandi í lok mars. Annar þeirra hafði falið tæplega 900 töflur í MIMI sælgætispoka og var með svipaðan fjölda af töflum í nærbuxum sínum, þeim sömu og hann klæddist við komuna til landsins.
Þá kom þriðji maðurinn til landsins í byrjun apríl síðastliðnum frá Gdansk, en sá hafði falið tæplega 900 töflur í raksápubrúsa í ferðatösku sinni. Sá fjórði kom frá Katowice í Póllandi, einnig í byrjun apríl, með svipaðan fjölda af töflum faldar í tveimur kaffibaunapokum í ferðatösku hans.
Hinn fimmti kom til landsins frá Gdansk um miðjan apríl. Sá reyndist vera með tæplega sjö hundruð töflur af OxyContin í fórum sínum, auk þess að vera með tæplega sextíu töflur af Contalgin fíknilyfinu.
Fimmmenningarnir voru allir stöðvaðir við tollhliðið á Keflavíkurflugvelli og fundust efnin við hefðbundna leit.
Við dómsuppkvaðningu Héraðsdóms Reykjaness krafðist dómari upptöku á efnunum, ásamt því að dæma mennina fimm til nokkurra mánaða fangelsisvistar. Enginn þeirra mætti fyrir dóm né boðaði forföll.
