Á fundi borgarráðs Reykjavíkur á föstudaginn lögðu Sósíalistaflokkur íslands og Flokkur fólksins fram bókanir varðandi laun Bjarna Bjarnasonar, forstjóra Orkuveitu Reykjavíkur og tillögu starfskjaranefndar frá júní síðastliðnum um að laun Bjarna hækki afturvirkt um 5,5 prósent frá fyrsta janúar 2022. Fréttablaðið greindi frá.
Sú tillaga var samþykkt þann 27. júní síðastliðinn af stjórn Orkuveitu Reykjavíkur. Hildur Björnsdóttir, núverandi oddviti Sjálfstæðisflokksins sat hjá.
Í fyrra var greint frá því að stjórn OR hafi samþykkt að hækka laun Bjarna um 370 þúsund krónur á mánuði, eða 14,8 prósent. Laun Bjarna væru þar að leiðandi orðin 2.872.669 krónur. Með hækkuninni sem nú hefur verið samþykkt bætast tæp 160 þúsund við þau og kemur mánaðarlaunum forstjórans yfir þrjár milljónir.
„Á meðan að manneskjur á lágmarkslaunum og undir því eiga ekki fyrir mat út mánuðinn er verið að hækka laun forstjóra sem er á ofurlaunum,“ segir meðal annars í bókun Sósíalistaflokksins.
Í bókun Flokks fólksins segir að laun Bjarna séu út úr öllu korti, sérstaklega í ljósi þess að verðbólga hafi ekki verið hærri síðan fyrir hrun.
„Það er ekkert lögmál að forstjórar eigi að vera á ofurlaunum,“ segir meðal annars í bókuninni.
Hægt er að lesa greinina í heild sinni hér.
