Eva segir Skúla eiga í sér­stöku sam­bandi við veru­leikann: Grunaður um mis­tök í starfi sem leiddi til sex and­láta

Lög­maðurinn Eva Hauks­dóttir segir að læknirinn Skúli Tómas Gunn­laugs­son, sem er grunaður um stór­felld brot í starfi, eigi í nokkuð sér­stöku sam­bandi við veru­leikann. Skúli er grunaður um að hafa sett nokkra sjúk­linga í lífs­loka­með­ferð án þess að það væri til­efni til þess, meðal annars móður Evu.

Í pistli á Vísi segir Eva að ekkert hefði heyrst um af­stöðu Skúla síðan í desember 2021. Þá greindu fjöl­miðlar frá því að Skúli teldi að kæru­mál gegn sér væru byggð á mis­skilningi.

„Nú hefur lög­reglan lokið rann­sókn og mis­skilningurinn er ekki stærri en svo að málinu hefur verið vísað til á­kæru­sviðs,“ segir Eva.

Undan­farið hefur verið mikið fjallað um mál Skúla, sem segist borinn röngum sökum og að mats­gerðir dóm­kvaddra mats­manna sanni sak­leysi hans. Fjöldinn af vinum Skúla, læknar og heil­brigðis­starfs­menn hafa stigið fram og lýst yfir stuðningi við Skúla og gagn­rýnt ein­hliða um­fjöllun fjöl­miðla í málinu.

Eva segir að sam­kvæmt mat­gerð sem varðar hjúkrun var reglum fylgt við um­önnun. Hins vegar í mats­gerð sem varðar læknis­fræði­lega með­ferð, sem Skúli bar á­byrgð á að sögn Evu, sætti móðir hennar lífs­loka­með­fer sem ekki voru for­sendur fyrir.

„Staðan er ein­fald­lega sú að;

ó­háður sér­fræðingur sem vann á­lits­gerð fyrir em­bætti land­læknis telur að ekki hafi verið for­sendur fyrir lífs­loka­með­ferð,
sér­fræðingar em­bættis land­læknis telja að ekki hafi verið for­sendur fyrir lífs­loka­með­ferð,
dóm­kvaddir mats­menn hafa í tví­gang komist að þeirri niður­stöðu að ekki hafi verið for­sendur fyrir lífs­loka­með­ferð.
Þá er undar­leg sú stað­hæfing Skúla að sjúk­lingar hans hafi látist af náttúru­legum or­sökum því eðli máls sam­kvæmt deyr fólk af náttúru­legum or­sökum ef það er sett á lífs­loka­með­ferð. Þess vegna á ekki að beita lífs­loka­með­ferð fyrr en sjúk­lingurinn er sannar­lega deyjandi,“ segir Eva.

Hægt er að lesa skoðunar­grein Evu hér.