Margeir Sveinsson, aðstoðaryfirlögregluþjónn á höfuðborgarsvæðinu segir í samtali við Fréttablaðið að í heildina hafi fjórtán verið handteknir og fimm verið sleppt í kjölfar stunguárásar á skemmtistaðnum Bankastræti Club á fimmtudag. Hann segir að lögreglan sé vör við hótanir á samfélagsmiðlum milli aðila sem tengjast árásinni.
„Í heildina hafa fjórtán verið handteknir og fimm hefur verið sleppt. Í gær fóru fimm aðrir í gæsluvarðhald, annars vegar fóru þrír í tveggja vikna gæsluvarðhald og tveir í eina viku. Svo er verið að gera kröfu um gæsluvarðhald yfir fjórum sem teknir voru í gær og í nótt,“ segir Margeir.
Margeir segir að lögregla sé vör við hótanir á samfélagsmiðlum á milli aðila sem tengjast málinu. Hann segir að lögregla aðhafist ekkert í slíkum hótunum, nema sá sem verði fyrir þeim ákveði að kæra.
Í útvarpsþættinum Veislan á FM957 hélt einn af þeim sem varð fyrir stunguárás því fram að hann hafi verið stunginn sjö sinnum.
„Ég get ekki staðfest það. En ef læknarnir hafa séð sjö stungur þá hlýtur það að vera,“ segir Margeir.
Þá vildi Margeir ekki tjá sig um hvort lögregla hafi lagt hald á vopnin sem voru notuð í árásinni.
