Hrafn Magnússon og Þorgeir Eyjólfsson draga fullyrðingar Jin Zhijian, kínverska sendiherrans á Íslandi, um viðbrögð kínverskra stjórnvalda við COVID-19 í efa, í aðsendri grein sem birtist í Fréttablaðinu í dag.
Þar bregðast þeir félagar við grein Jin sem birtist í Fréttablaðinu þann 15. apríl síðsatliðinn. Þar sagði Jin meðal annars að Kína hefði verið fyrsta landið til að tilkynna smit af völdum veirunnar til alþjóðaheilbrigðismálastofnunarinnar. Undirstrikaði hann mikilvægi samstöðu, viðbrögð Kínverja hefðu verið ábyrg.
„Kína var fyrsta landið til að tilkynna smit af völdum „Nýju kórónaveirunnar“ til WHO, Alþjóðaheilbrigðismálastofnunarinnar, þegar útbreiðslan hófst í Wuhan borg, en það þýðir samt ekki endilega að uppruni vírussins hafi verið í Wuhan. Leitin að uppruna vírussins ætti að vera í höndum til þess bærra vísindamanna og heilbrigðisstarfsmanna. Engin niðurstaða er enn komin í leitina að uppruna veirunnar, en það mun vonandi koma í ljós með tímanum.“
Eins og áður segir bregðast þeir Hrafn og Þorgeir við skrifum sendiherrans í Fréttablaðinu í dag. Þar rekja þeir atburðarás sem er á skjön við fullyrðingar sendiherrans. Þar kemur meðal annars fram að kínversk stjórnvöld hafi reynt að þagga niður í vísindamönnum um að smitfaraldur væri farinn af stað.
„Á nýársdag var markaðinum í Wuhan lokað. Sama dag var Dr. Li Wenliang, sem var í hópi lækna sem vöruðu við útbreiðslu veirunnar á samfélagsmiðlum undir lok desember, kallaður til yfirheyrslu í Wuhan þar sem hann var borinn sökum um að hafa dreift sögusögnum. Sjö aðrir voru handteknir af sömu ástæðum og Dr. Li og eru afdrif þeirra einstaklinga ekki þekkt. Nokkrar greiningar höfðu þá verið framkvæmdar á rannsóknarstofum sem staðfestu tilvist veirunnar. Vitað er um smit 15 heilbrigðisstarfsmanna á fyrstu dögum ársins og því er ljóst að yfirvöldum var vel kunnugt að sjúkdómurinn smitaðist manna á milli,“ skrifa félagarnir.
„Hinn 3. janúar 2020 gáfu yfirmenn heilbrigðisyfirvalda út þagnartilskipun (gag order) ásamt fyrirmælum um að öll lungnabólgusýni af sýnatökustöðum skyldu fjarlægð eða eyðilögð. Þann 5. janúar greindi WHO (Alþjóðaheilbrigðisstofnunin) í yfirlýsingu frá því að stofnuninni hafi verið greint á gamlársdag frá lungnabólgutilvikum af óþekktum uppruna í Wuhan borg. Þennan dag byrjuðu sjúklingar með einkenni veirusjúkdómsins að leita í hópum til spítala í Wuhan sem leiddi til ófremdarástands nokkrum dögum síðar. Það var ekki fyrr en 8. janúar að kínversk heilbrigðisyfirvöld staðfestu að nýtt af brigði kórónaveirunnar valdi sjúkdómnum. Yfirvöld héldu hins vegar uppteknum hætti og endurtóku að engar sannanir væru til staðar um að vírusinn smitaðist á milli manna sem myndu gera hann hættulegan og ekki hefði verið hægt að tengja hann dauðsföllum.“
Þeir félagar taka fram að þeir eftirláti lesendum um að draga ályktanir af ofangreindri atburðarás:
„Lesendum blaðsins er eftirlátið að draga ályktanir af ofangreindri atburðarás og að hversu miklu leyti hún styður frásögn kínverska sendiherrans um að Kína hafi brugðist við með opnum og ábyrgum hætti líkt og sagði í grein hans. Trúverðugleika talna í upplýsingagjöf kínverskra stjórnvalda má efast um. Hvernig stenst tala um 4.632 látna 25. apríl af völdum veirunnar í landi 1.400 milljón manna þegar fyrir liggja tölur á sama tíma um 26.384 látna á Ítalíu sem er 60 milljón manna þjóð eða tölur um 22.902 látna á Spáni sem er 47 milljón manna þjóð? Dæmi hver fyrir sig.“
