Björn Leví ó­sáttur: „Píratar hlaupa ekki undan á­byrgð en við krefjumst á­byrgðar“

Þing­maðurinn Björn Leví Gunnars­son veltir fyrir sér skipun em­bættis­manna án aug­lýsingar í nýjasta blogginu sínu. Hann segir það ekki miklar kröfur að stjórn­mála­menn vinni fag­lega og segir að tæki­færis­mennska og valda­bar­átta séu ráðandi í ís­lenskum stjórn­málum.

„Í síðustu viku var enn einn em­bættis­maður skipaður í stöðu án aug­lýsingar. Í saman­tekt for­sætis­ráðu­neytisins sem mbl.is fjallaði um í októ­ber á síðasta ári kemur fram að um 20 prósent em­bættis­skipanna á árunum 2009 til 2022 hafi verið án aug­lýsingar. Áður hafði þjóð­minja­vörður verið skipaður án aug­lýsingar, við­komandi var víst sér­stak­lega hæf og upp­fyllir öll skil­yrði,“ segir Björn.

Þarna er Björn að vísa í það að Willum Þór Þórs­son heil­brigðis­ráð­herra, skipaði nýjan for­stjóra Sjúkra­trygginga án aug­lýsinga og Lilja Al­freðs­dóttir mennta­mála­ráð­herra, skipaði Þjóð­minja­vörð án aug­lýsingar.

Björn segir það vissu­lega í lögum að það sé til svig­rúm í lögum til þess að færa fólk í starfi án aug­lýsingar, þó um­sagnir og álit um þær laga­breytingar gerðu ráð fyrir því að sam­bæri­legt starf myndi þá verða laust á sama tíma, sem myndi þá verða aug­lýst.

„Á meðan þau rök hljóma skyn­sam­lega þá verðum við að skoða hvernig heimildin er notuð. Í þessum tveimur ný­legu til­vikum þá er um að ræða stöðu­hækkun. Það er strangt til tekið ekki verið að flytja fólk í starfi. Það er verið að veita fólki stöðu­hækkun og aug­lýsingin sem kemur í kjöl­farið er vegna öðru­vísi starfs en þess sem hefði átt að aug­lýsa,“ segir Björn.

Björn segir að sú um­ræða hafi komið upp að Píratar hefðu svo mikið prinsipp að enginn flokkur hefði á­huga á að vinna með þeim í meiri­hluta. Ef eitt­hvað prinsipp­mál kæmi upp þá myndu þau segja sig úr ríkis­stjórn.

„Þetta er mjög á­huga­verð spurning, því stjórn­mál hljóta að snúast um prinsipp. En við erum kannski orðin svo vön því að stjórn­mála­menn selji sálu sína á altari valdsins að við ein­fald­lega búumst ekki við neinum prinsippum,“ segir Björn.

Björn segir það ekki miklar kröfur að vilja að stjórn­mála­menn vinni fag­lega.

„Nei. Píratar hlaupa ekki undan á­byrgð en við krefjumst á­byrgðar. Svona endur­teknar stöðu­hækkanir án aug­lýsingar eru ekki fag­leg vinnu­brögð. Við eigum að geta gert betur og þurfum að gera kröfu að stjórn­mála­menn geri betur. Það ætti að hringja öllum við­vörunar­bjöllum þegar stjórn­mála­flokkar treysta sér ekki til sam­starfs við flokk sem gerir bara ein­faldar kröfur um fag­leg vinnu­brögð. Það er góð vís­bending um að það er eitt­hvað mikið að í ís­lenskum stjórn­málum - „tæki­færis­mennska, valda­bar­átta.”,“ segir Björn að lokum.