Leikarinn og leikstjórinn Benedikt Erlingsson segir að það sé ósmekklegt af hálfu Laufeyjar Guðjónsdóttur, forstöðumanni Kvikmyndasjóðs Íslands, að hún skreyti sig af kvikmynd Benedikts, Hross í oss, eftir að hún neitaði að styðja verkefnið að fullu á sínum tíma.
Laufey, sem er að hætta sem forstöðumaður KMÍ var í viðtali hjá fréttablaði Nordic Filmd and TV News þar sem hún var spurð hvaða íslensku kvikmyndaverkefnum hún man eftir með hlýhug. Laufey svaraði að hún hafi verið einkar stolt þegar Hross í oss vann til verðlauna á Nordic Council Film Prize árið 2014.
Benedikt leikstýrði Hross í oss og var hann ósáttur við að Laufey skildi tala um myndina í þessu samhengi, enda hafi hún, að sögn Benedikts, veðjað gegn myndinni á sínum tíma.
„Ég verð að nota þennan vettvang til að halda því til haga að Laufey Guðjónsdóttir veðjaði EKKI á Hross í oss á sínum tíma. Því hún veitti okkur ekki fullan framleiðslustyrk. Við fengum svona “mini” styrk. Ástæðan sem mér var gefin var að ég væri byrjandi. Gott og vel, en á sama ári veitti hún öðrum byrjanda ríflegan fullan styrk, og svo öll næstu ár á eftir veitti hún byrjendum fulla framleiðslustyrki fyrir sínar fyrstu myndir og er það vel,“ skrifar Benedikt á Facebook.
Benedikt segir að þessi litli stuðningur við verkefni hans hafi ekki verið honum sársaukalaus. Hann tók sjálfur lán, með veði á húsinu sínu og safnaði fjárfestum. Vinir, fjölskylda og velunnarar aðstoðuðu Benedikt við að gera myndina, sem átti eftir að slá í gegn og vann Benedikt til Norðurlandaverðlauna, fyrstur íslenskra kvikmyndagerðarmanna.
Benedikt segir að hann hafi einnig fengið litla sem enga aðstoð frá KMÍ þegar hann leikstýrði Kona fer í stríð, sem vann einnig til fjölda verðlauna árið 2017.
„Og hef ég oft skálað við Laufeyju rjóða í kinnum á hátíðum þar sem þessum íslensku myndum hefur verið hampað,“ skrifar Benedikt, en bætir við að auðvitað hafi Laufey haft fullan rétt á að velja og hafna hvaða verkefni fengu styrki.
„Hins vegar finnst mér það ósmekklegt í ljósi þessa og annarra afskipta hennar af mínum verkum að hún í lok ferilsins skreyti sig með “Hrossinu” sem hún studdi ekki að fullu. Auðvitað er það óskaplega mannlegt en samt ósmekklegt,“ skrifar Benedikt.
Nú þegar nýr forstöðumaður tekur við KMÍ vonast Benedikt eftir því að sá aðili fái ekki að sitja jafn lengi og Laufey, sem hefur verið yfir KMÍ í tuttugu ár.
„Ég óska þess að nýr forstöðumaður innleiði meiri heiðarleika og gegnsæi og þori að standa með ákvörðunum sínum,“ skrifar Benedikt, sem telur það beinlínis hættulegt íslenskri kvikmyndagerð að heil kynslóð listamanna eigi allt undir smekk eða vináttu einnar konu hálfa starfsævina.
