Tvær konur og ungur sonur þeirra smituðust á dögunum af hættulegum veirusjúkdómi í Alicante á Spáni. RÚV greinir frá en samkvæmt frétt El País er í fyrsta sinn sem þessi vírus greinist á Spáni en vírusinn kallast Chikungunya. Berst hann með tveimur tegundum af moskítóflugum.
Vírusinn er afar fágætur í Evrópu en nokkuð útbreiddur í Afríku og Asíu. Þá hafa nokkur tilfelli greinst í Frakklandi og á Ítalíu. Eftir að Landlæknisembættið á Íslandi lét kollega á Spáni vita um að Íslendingarnir hefðu smitast af sjúkdómnum var ákveðið að grípa til viðeigandi ráðstafana og það þrátt fyrir að engar tilkynningar hafi borist af fleiri smitum á Spáni.
Þórólfur Guðnason sóttvarnarlæknir segir í samtali við Morgunblaðið:
„Fólkið ætti ekki að verða alvarlega veikt. Einkenni veirunnar eru vægur hiti, útbrot og vöðvaverkir eins og margar veirur geta valdið. Í ákveðnum tilfellum getur þetta valdið alvarlegri liðverkjum og í mjög sjaldgæfum tilfellum sýkingu í taugakerfi.“
Þá segir á vef RÚV að þau sem smitast séu ekki meðhöndluð með lyfjum. Ástæðan er einföld, lyf fyrir þennan sjúkdóm hafa ekki verið þróuð og þá er bóluefni ekki til heldur. Meðferð felst í að lina sársauka og bæta líðan hinna smituðu. Þá leiðir veiran sjaldnast til dauða.
Nánar er fjallað um málið á vef Ríkisútvarpsins.
