Útlendingastofnun sendi frá sér yfirlýsingu í hádeginu sem Hringbraut hefur undir höndum. Var það vegna albanskrar fjölskyldu sem var send úr landi í morgun, en móðirin er gengin 35 vikur og fimm daga. Hefur Útlendingastofnun verið harðlega gagnrýnd vegna málsins. Útleningastofnun segir að heilsu hennar hafi ekki verið stefnt í hættu en í vottorði, gefið út af íslenskum lækni, segir að konan ætti erfitt með langt flug. Ekki var tekið neitt mark á þeirri aðvörun.
Í yfirlýsingu Útlendingastofnunar segir orðrétt:
„Ef vottorð liggur fyrir um að flutningur einstaklings úr landi muni stefna öryggi hans í hættu þá er flutningi frestað þangað til ástandið breytist [...]
„Viðkomandi leitaði sjálf til læknis á kvennadeild Landspítalans þar sem gefið var út annað vottorð og stoðdeild fékk afrit af. Í því vottorði kom ekkert fram um að flutningur viðkomandi úr landi myndi stefna öryggi hennar í hættu og því var fyrirhuguðum flutningi ekki frestað.“
Það er því afar athyglisvert að skoða vottorð konunnar en þar segir:
Til þess er málið varðar
„Það vottast hér með að .... er ófrísk og gengin 35 vikur og 5 daga. Hún er slæm af stoðkerfisverkjum í baki og ætti erfitt með langt flug.“
Þá hafa No Borders birt annað bréf sem sýnir að konan átti tíma hjá mæðravernd í dag.