Guðlaugur Þór Þórðarson utanríkisráðherra lagði áherslu á fjölþjóðlegt samstarf, þar á meðal alþjóðaviðskipti, loftslagsmál, mannauð, mannréttinda- og jafnréttismál, í ávarpi sínu í þróunarnefnd Alþjóðabankans og Alþjóðagjaldeyrissjóðins í gærkvöldi. Þá ræddi hann um mikilvægi fjármögnunar þróunar, meðal annars með betri skattheimtu, og að koma í veg fyrir ólöglegt fjármagnsflæði og skattaundanskot. Þetta kemur fram í tilkynningu á vef Stjórnarráðsins. Guðlaugur sagði:
„Í þessu sambandi er líka nauðsynlegt að beina sjónum að skuldastöðu þróunarríkjanna og aðgerðum til að bregðast við henni. Þá er ég sannfærður um að einkageirinn geti gegnt mikilvægu hlutverki við fjármögnun þróunar.“
Ísland á sæti í þróunarnefndinni á árinu 2019. Hélt Guðlaugur ávarpið fyrir hönd kjördæmis Norðurlandanna og Eystrasaltsríkjanna. Utanríkisráðherra óskaði nýjum forseta bankans, David Malpass, til hamingju með embættið. Malpass lagði í opnunarávarpi sínu áherslu á að öflugu starfi bankans í baráttunni gegn fátækt, fyrir sjálfbærum hagvexti og auknum jöfnuði verði haldið áfram.
Þá segir einnig á vef Stjórnarráðsins: Þróunarnefndin er sameiginleg ráðherranefnd Alþjóðabankans og Alþjóðagjaldeyrissjóðsins og sinnir pólitískri stefnumörkun í alþjóðlegri þróunarsamvinnu gagnvart stofnununum tveimur. Nefndin er skipuð 25 ráðherrum frá aðildarríkjum stofnananna, þ.e. einum ráðherra frá hverju kjördæmi í stjórn, ásamt formanni sem er kosinn af þróunarnefndinni. Hún hittist tvisvar á ári í tengslum við vorfundi og ársfundi Alþjóðabankans og Alþjóðagjaldeyrissjóðsins.
Á fundi þróunarnefndarinnar að þessu sinni voru einkum til umræðu innleiðing hlutafjáraukningar Alþjóðabanka til enduruppbyggingar og framþróunar og Alþjóðalánastofnunarinnar og sú stefnumörkun sem fylgir henni. Þá var einnig rædd vinna bankans við að samþætta tæknimál í starfseminni og verkefni í þróunarlöndum.
Utanríkisráðherra tók einnig þátt í fundi hóps smáríkja innan Alþjóðabankans. Fimmtíu lönd eru í hópnum, þar á meðal Ísland. Meirihlutinn eru lítil eyríki í Kyrrahafinu og Karíbahafinu. Fundur smáríkjanna er sameiginlegur vettvangur landanna þar sem þeim gefst tækifæri til að vekja athygli alþjóðasamfélagsins á þeim sérstöku áskorunum sem smáríki standa frammi fyrir.
Í ár var þar lögð áhersla á þrjú málefni: aðlögun og viðnámsþrótt í tengslum við loftslagsbreytingar, sjálfbærni í efnahagslegu og fjárhagslegu tilliti, og bláa hagkerfið og mengun sjávar.
Lagði utanríkisráðherra í ávarpi sínu áherslu á þau tækifæri fyrir smáeyríki sem felast í að nýta auðlindir hafsins á sjálfbæran hátt. Einnig þyrfti að taka alvarlega og vinna gegn þeirri ógn sem stafar af loftslagsbreytingum og mengun í hafi.
