Lögreglan á höfuðborgarsvæðinu hafði nóg að gera í gærkvöldi og nótt en fimmtíu og eitt mál komu inn á borð til hennar.
Um 18 leitið í gær var tilkynnt að glerlistaverki og mögulega fleiri verkum hafi verið stolið úr galleríi í miðbænum.
Rúmlega hálf fjögur í nótt fékk lögreglan tilkynning um líkamsárás fyrir utan verslun í miðbænum. Ókunnugur maður réðst á konu og veitti henni áverka. Konan gat gefið góða lýsingu á árásarmanninum en hann hefur ekki enn fundist.
Þegar klukkan var að ganga fimm í morgun var tilkynnt um grunsamlegar mannaferðir í hverfi 108. Þar var þrítugur karlmaður handtekinn á vettvangi grunaður um þjófnað úr nokkrum bifreiðum. Hann var vistaður í fangageymslu.
Rétt fyrir klukkan átta í gærkvöldi óskaði starfsfólk verslunar í hverfi 109 eftir aðstoð lögreglu vegna þjófnaðar á matvörum. Sakborningur var látinn laus að lokinni skýrslutöku.
Rúmega 21 í gærkvöldi varð umferðaróhapp á Veturlandsvegi í hverfi 110. Um var að ræða árekstur tveggja bifreiða en ekkert slys varð á fólki.