„Kjarninn vekur athygli á sterkri stöðu Sósíalista sem náðu fyrir lítið fé að rífa sig frá fjölda nýrra framboða í Reykjavík og sækja meira fylgi en sumir þingflokkanna: „Sósíalistaflokkurinn náði 6,4 prósent atkvæða í borgarstjórnarkosningunum í Reykjavík í fyrra og Sanna Magdalena Mörtudóttir er í kjölfarið í mjög sterkri stöðu í borgarstjórn.“
Þetta segir Gunnar Smári Egilsson um þær fregnir að Kári Stefánsson hafi styrkt Sósíalistaflokkinn um 250 þúsund krónur.
Gunnar Smári bætir við: „Sósíalistaflokkurinn var eini flokkurinn sem náði inn kjörnum fulltrúa sem er ekki með fulltrúa á Alþingi í dag, og hafði því ekki aðgengi að þeim hundruð milljóna sem hinir sjö flokkarnir sem náðu inn er skammtað af fjárlögum ár hvert. Sósíalistar ráku þess í stað mjög árangursríka, einbeitta, skýra og stílhreina baráttu í gegnum samfélagsmiðla fyrir sáralítið fé sem vakti mikla og verðskuldaða athygli.“
Þá sagði Gunnar Smári einnig: „Flokkurinn skuldar engum og er ungur, frjáls og ört vaxandi. Kári er augljóslega smekkmaður á flokka.“
Þá vitnar Midjan.is sem ritstýrt er af Sigurjóni M. Egilssyni, bróður Gunnars Smára í viðtal sem tekið var við Kára fyrir nokkru í Stundinni.
„Það sem mér finnst hins vegar dálítið erfitt fyrir gamlan sósíalista er að sitja uppi með að vera svona auðkýfingur í þessu samfélagi.“