„Hugarfar, félag fólks með ákominn heilaskaða og aðstandenda þeirra, harmar þá stöðu sem upp er komin á Reykjalundi vegna fyrirvaralausra uppsagna fyrrum framkvæmdastjóra og yfirmanns lækninga, Birgi Gunnarssonar og Magnúsar Ólasonar.“
Þetta kemur fram í tilkynningu frá samtökunum. Það var Hringbraut sem greindi fyrst frá brottrekstri forstjórans. Í tilkynningunni segir:
„Starfshættir stjórnar SÍBS hafa skapað mikinn óróa á Reykjalundi sem hefur haft í för með sér að starfsmenn hafa lýst vantrausti á stjórn SÍBS og fjöldi lækna hefur sagt upp störfum. Þessi staða kemur til með að bitna á meðferð sjúklinga sem er grafalvarlegt mál.“
Þá segir einnig að Hugarfar hafi í samstarfi við fyrrum stjórnendur og heilaskaðateymi Reykjalundar unnið markvisst að því að stuðla að framförum á meðferð einstaklinga sem hafa hlotið heilaskaða.
„Þrátt fyrir að heilaskaði er ein algengasta orsök áunninnar fötlunar hjá ungu fólki og ein meginorsök ótímabærs dauða þá er engin heildstæð stefna né langtíma meðferðarúrræði til staðar. Meðferðin sem fer fram á Reykjalundi er bráðnauðsynleg fyrir bata þessara einstaklinga og því skiptir sköpum að ró skapist um starfsemina þannig að sjúklingar fái faglega meðferð,“ segir í tilkynningunni.
Árlega verða um 900 manns fyrir heilaskaða en einungis 80 fá greiningu og bráðameðferð vegna þessa. Eftir sitja ríflega 800 manns sem fá enga endurhæfingu. Það er ljóst að kostnaður samfélagsins er gríðarlega mikill þar sem svo stór hópur fær ekki endurhæfingu við hæfi. Til þess að einstaklingar með heilaskaða geti fótað sig sjálf í samfélaginu á ný þarf að stórefla þá endurhæfingu sem er í boði.
Guðrún Harpa Heimisdóttir formaður Hugarfars, segir:
„Á síðastliðnum árum hefur átt sér stað öflug uppbygging heilaskaðateymis á Reykjalundi og mjög mikilvægt að það áframhald verði á því. Heilskaðateymið býr yfir mikilli þekkingu á afleiðingum höfuðhögga og heilaskaða.
Sú þekking er af skornum skammti í heilbrigðiskerfinu. Samkvæmt tillögum heilbrigðisráðherra byggt á skýrslu starfshóps um stefnubreytingar í meðferð einstaklinga sem hlotið hafa heilaskaða þá stendur til að bæta meðferðina, m.a. á Reykjalundi.
Mikilvægt að sú innleiðing gangi eftir með nýjum stjórnendum. Við erum jafnframt áhyggjufull fyrir hönd okkar skjólstæðinga enda er ástand þeirra mjög viðkvæmt og nauðsynlegt að ekki ríki órói í kringum starfsemi stofnunarinnar og tryggð sé áframhaldandi fagleg meðferð.“
