„Ég hugsa til starfsmanna Samherja sem horfa nú á stríðsfyrirsagnir um fyrirtækið og stjórnendur þess. Sérstakt samband virðist milli Ríkisútvarpsins og Stundarinnar enda er oft sagt að líkur sæki líkan heim. Hvort eitthvað er til í þeim ásökunum sem komið hafa fram verður framtíðin að leiða í ljós og hugsanlega dómstólar. Sem betur fer dæma ekki fjölmiðlar eða þeir sem hrópa á torgum í máli þessu heldur dómstólar, gangi málið til þeirra.“
Þetta segir Gunnar Bragi Sveinsson þingmaður Miðflokksins og fyrrverandi utanríkisráðherra í pistli í Morgunblaðinu. Í vikunni var sagt í Kveik og á Stundinni að Samherji stundaði stórfelldar mútugreiðslur til stjórnmála- og embættismanna í Afríkuríkinu Namibíu til þess að ná undir sig fiskveiðikvóta. Gunnar Bragi gagnrýnir fjölmiðla og þá helst RÚV og Stundina og sakar þá miðla um að matreiða fréttamál í sameiningu eftir eigin höfði til að láta hlutina líta út fyrir að vera verri. Gunnar Bragi segir:
„Ef til vill telja einhverjir fjölmiðlar það skyldu sína að matreiða fréttir í sem mestum æsifréttastíl ef heildarmyndin er ekki nógu hneykslanleg. Þá er ekki spáð í neitt annað en áhorfstölur, lestur, flettingar og „klikk“ á vefsíðum.“
Gunnar Bragi víkur einnig talinu að fjármögnun fjölmiðla og hvað ríkið hyggst leggja til. Flokkur Gunnars Braga, Miðflokkurinn, lagði fram tillögu þess efnið að hætt yrði að ríkisvæða fjölmiðla.
Þá segir Gunnar Bragi að Samherji sé eitt öflugasta fyrirtæki landsins og segir slæmt að það sé sakað um vafasama viðskiptahætti. Gunnar Bragi segir einnig:
„Þeir og aðrir sem að fyrirtækinu standa eða starfa hjá því eiga fjölskyldur, börn sem skilja ekki orðin sem notuð eru eða hvers vegna fjölskyldufaðirinn eða móðirin blandast inn í þá umræðu sem búin var til með æsifréttastílnum. Æsingur fjölmiðilsins til að ná athyglinni er stundum svo mikill að annað skiptir ekki máli. Athygliskeppnin er eins og aurskriða sem engu eirir og síst sannleikanum sem kannski kemur í ljós seint og um síðir.“
