Skólameistari Fjölbrautaskólans við Ármúla segir það ekki rétt að Frey Vilmundarsyni hafi verið vikið úr skólanum. Í gær fullyrti faðir Freys að sonur sinn hefði verið rekinn úr sérdeild skólans eftir aðeins tveggja daga skólagöngu.
„Honum hefur ekki verið vikið úr skólanum. Það er ekki rétt. Við megum ekki víkja nemendum úr skóla sem ekki eru orðnir 18 ára gamlir,“ sagði Magnús Ingvason, skólameistari FÁ í samtali við Mbl.is í gær.
Freyr, sem er 16 ára gamall fatlaður drengur, mætir hins vegar ekki í skólann í dag að sögn Magnúsar. Hann bætir við að það sé ekki óalgengt að sá háttur sé hafður á á meðan unnið er úr málum nemenda.
„Við erum að leita lausna og vonandi finnst fljótt góð lausn þar sem hagur hans er hafður að leiðarljósi,“ segir Magnús. Hann segist ekki geta tjáð sig um mál Freys að öðru leyti því hann sé bundinn trúnaði.
Í gær var haldinn fundur þar sem fólk sem kemur að málum Freys kom saman. Á fundinum voru meðal annarra starfsmenn skólans, fulltrúi frá félagsþjónustu borgarinnar, fulltrúi frá sambýlinu þar sem Freyr býr og móðir hans.